Թուրքական ընկերությունը հայտարարել է, որ դադարեցնում է ՌԴ-ի հետ կապված բեռնափոխադրումները՝ Սենեգալի ափերի մոտ իր լցանավի պայթեցումից հետո

Թուրքական «Beşiktas Shipping» նավագնացության ընկերությունը հայտարարել է, որ դադարեցնում է Ռուսաստանի հետ կապված բոլոր բեռնափոխադրումները, հաղորդում է Reuters-ը՝ հղում անելով ընկերության հայտարարությանը: Նշվում է, որ նոյեմբերի վերջին ընկերության «Mersin» լցանավը վնասվել էր Սենեգալի ափերի մոտ, գրում է The Insider-ը:

«Մեր գործունեության ամբողջ ընթացքում խստորեն պահպանել ենք բոլոր միջազգային պատժամիջոցները՝ լիովին հետևելով G7/EU նավթի գների սահմանափակման մեխանիզմին և բոլոր համապատասխան առևտրային սահմանափակումներին։ Այնուամենայնիվ, տարածաշրջանում անվտանգության իրավիճակը զգալիորեն վատթարացել է։ Մանրակրկիտ գնահատումից հետո եզրակացրել ենք, որ մեր նավերի և անձնակազմի համար ռիսկերը դարձել են անընդունելի։ Քանի որ մեր անձնակազմի և ակտիվների անվտանգությունը մեր գերակա խնդիրն է, մենք դադարեցնում ենք բոլոր նմանատիպ գործողությունները»,- ասվում է հայտարարության մեջ:

Ստամբուլում գործող «Beşiktas Shipping» նավագնացության ընկերությունը տիրապետում է Թուրքիայի ամենամեծ լցանավային նավատորմերից մեկին (29 լցանավ):

Ավելի վաղ հաղորդվել էր, որ նոյեմբերի 27-ին «Mersin»-ը վնասվել էր չորս արտաքին պայթյուններից, որից հետո նավը սկսել էր խորտակվել։ Սեփականատերը պնդում է, որ անձնակազմի անդամներից ոչ ոք չի տուժել, բեռի արտահոսք չի եղել։ Պայթյունների պատճառը մնում է անհայտ։ Թուրքական Istanbul Haber-ը հայտնել է, որ լցանավը հարձակման է ենթարկվել ուկրաինական անօդաչու թռչող սարքերի կողմից, քանի որ այն տեղափոխում էր ռուսական նավթ։

Նոյեմբերի 28-ից դեկտեմբերի 2-ը ընկած ժամանակահատվածում Թուրքիայի ափերի մոտ հարձակման է ենթարկվել Ռուսաստանի հետ կապված երեք լցանավ։

Թարգմանությունը՝ Էմմա Չոբանյանի