31.10.2026 | 12:34
Կյանքի թանկացման դեմ բողոքի ցույցերը տարածվում են Եվրոպայում․ ակցիաներ են եղել նաև Իտալիայի ավելի քան 60 քաղաքում
ԱՄՆ-ը դադարեցրել է 19 երկրներից ներգաղթի դիմումների դիտարկումը
Քաղաքականություն
03.12.2025 | 14:43
ԱՄՆ նախագահի վարչակազմը հրահանգել է ժամանակավորապես դադարեցնել 19 երկրներից, հիմնականում՝ Մերձավոր Արևելքից և Աֆրիկայից ժամանած անձանց ներգաղթային դիմումների դիտարկումը (ներառյալ՝ «գրին քարտերի» և քաղաքացիության դիմումների) մշակումը, հաղորդում է NBC News-ը՝ հղում անելով ԱՄՆ քաղաքացիության և ներգաղթի ծառայության (USCIS) հայտարարությանը։
Սահմանափակումները վերաբերում են Իրանի, Սուդանի, Լիբիայի, Էրիթրեայի, Հայիթիի, Սոմալիի, Եմենի, Աֆղանստանի, Թուրքմենստանի, Չադի Հանրապետության, Տոգոյի, Սիեռա Լեոնեի, Հասարակածային Գվինեայի, Բուրունդիի, Կոնգոյի Հանրապետության, Մյանմայի, Լաոսի, Կուբայի և Վենեսուելայի քաղաքացիներին, գրում է The Insider-ը։
Այս տարվա հունիսին ԱՄՆ նախագահ Դոնալդ Թրամփը ստորագրեց հռչակագիր, որով այդ երկրների քաղաքացիների՝ ԱՄՆ մուտքի սահմանափակումներ էին սահմանվում։ 12 երկրների համար արգելքը լիարժեք էր, ևս յոթ երկրի քաղաքացիների արգելվում էր ԱՄՆ մշտական ներգաղթը: Սակայն այդ ժամանակ նրանք պահպանում էին, օրինակ, աշխատանքային վիզաներ ստանալու իրավունքը։
Ըստ The New York Times-ի՝ նոր սահմանափակումները հիմնականում վերաբերում են «գրին քարտերի» և ԱՄՆ քաղաքացիության դիմումներին: Արդեն երեքշաբթի որոշ ներգաղթյալների համար «գրին քարտի» հարցազրույցի նշանակումները չեղարկվել են առանց բացատրության:
Սահմանափակումների խստացումը հաջորդել է նոյեմբերի վերջին Վաշինգտոնում տեղի ունեցած վերջին կրակոցներին։ Միջադեպի ժամանակ վիրավորվել էին Ազգային գվարդիայի երկու զինծառայող, որոնցից մեկը մահացել էր։ Ոստիկանության տվյալներով՝ կասկածյալը Աֆղանստանի քաղաքացի է։
Նա իր հայրենիքում համագործակցել էր ամերիկյան զորքերի և ԿՀՎ-ի հետ և Միացյալ Նահանգներ էր ժամանել 2021 թվականին։ Միջադեպից հետո Թրամփը և նրա կողմնակիցները կրկին կոչ էին արել ավելի խիստ վերահսկողություն սահմանել միգրանտների նկատմամբ։
Bloomberg-ը նաև հաղորդել է, որ ԱՄՆ վարչակազմը մտադիր է ընդլայնել ներգաղթի արգելքը՝ ներառելով մոտ 30 երկիր։
Թարգմանությունը՝ Էմմա Չոբանյանի
