«Նոան» խնդրել է «Լեգիայի» դեմ խաղի տոմսերը չփոխանցել երրորդ անձանց

Հայաստանի չեմպիոն ու գավաթակիր «Նոայի» սկսել է լեհական «Լեգիայի» դեմ Կոնֆերենցիաների լիգայի 5-րդ տուրի հանդիպման տոմսերի վաճառքը։ Ակումբը հայտարարությամբ է հանդես եկել այդ կապակցությամբ։

««Լեգիայի» հետ խաղի տոմսերն արդեն վաճառքում են։ Ուշադրություն։ Հյուր թիմի երկրպագուներին արգելվում է մուտքը տնային սեկտորներ։ Գնված տոմսերը վերադարձի ենթակա չեն։

Հարգելի երկրպագուներ, կա մեծ վտանգ տնային սեկտորում հյուր թիմի երկրպագուների ներթափանցման։

Անվտանգության նկատառումներից ելնելով՝ խնդրում ենք խաղի տոմսերը չփոխանցել երրորդ անձանց։

Կոնֆերենցիաների լիգայի Լիգայի փուլի 5-րդ տուրում կընդունենք Լեհաստանի ամենատիտղոսակիր թիմերից մեկին՝ «Լեգիային», որը հայտնի է նաև իր հզոր երկրպագուական շարժումով։

Դեկտեմբերի 11-ին սպասում ենք բոլորիդ «Հանրապետական» մարզադաշտում՝ տարվա վերջին տնային եվրագավաթային հանդիպմանը։ Տոմսերը կարող եք ձեռք բերել մեր կայքից»,- նշված է ակումբի հաղորդագրությունում։

«Նոա» – «Լեգիա» հանդիպումը կկայանա դեկտեմբերի 11-ին Վազգեն Սարգսյանի անվան «Հանրապետական» ստադիոնում ու կմեկնարկի ժամը 21։45-ին։ Լեհական ակումբում է խաղում Հայաստանի ազգային հավաքականի կիսապաշտպան Վահան Բիչախչյանը։

Հիշեցնենք, որ 4 խաղից հետո երևանյան ակումբն ունի 5 միավոր և 23-րդ տեղում է։ Կոնֆերենցիաների լիգայում փլեյ-օֆֆի ուղեգիր են նվաճում 1-24-րդ տեղ գրաված թիմերը։ Նախորդ 4 խաղերում «Նոան» հաղթել է խորվաթական «Ռիեկային» (1։0), ոչ-ոքի գրանցել ռումինական «Ունիվերսիտատեա Կրայովայի» (1։1) ու շոտլանդական «Աբերդինի» (1։1) հետ և պարտվել Չեխիայի գավաթակիր «Սիգմային» (1։2)։ Լիգայի փուլի վերջին տուրում Սանդրո Պերկովիչի գլխավորած թիմը դեկտեմբերի 18-ին արտագնա հանդիպում է անցկացնելու Կիևի «Դինամոյի» հետ։