19.08.2026 | 11:57
Forbes. Ամենաթանկ ֆուտբոլային ակումբներն աշխարհում
Դնեպրոպետրովսկում ռուսական հարձակման հետևանքով երկու մարդ է զոհվել. վիրավորներ կան
Քաղաքականություն
03.12.2025 | 12:42
Ռուսական զորքերը դեկտեմբերի լույս 3-ի գիշերը անօդաչու թռչող սարքերով հարվածել են Ուկրաինայի Պավլոգրադի շրջանի Տերնովկա քաղաքին, հայտնել է Դնեպրոպետրովսկի մարզային ռազմական վարչակազմի ղեկավարի պաշտոնակատար Վլադիսլավ Գայվանենկոն, գրում է Current time-ը։
Նրա տեղեկացմամբ՝ հարձակման հետևանքով զոհվել է երկու տղամարդ՝ 43 և 50 տարեկան։ Եվս երեք մարդ վիրավորվել է, որոնցից երկուսը (65-ամյա տղամարդ և կին) ծանր վիճակում են։
Հրդեհ է բռնկվել՝ մասամբ ոչնչացնելով մեկ մասնավոր տուն, վնասելով վեց տուն, ավտոտնակ և մեկ մեքենա։ Սինելնիկի շրջանի Վասիլկովսկա համայնքում վնասվել են ենթակառուցվածքներ։
Ուկրաինայի ռազմաօդային ուժերի տվյալներով՝ դեկտեմբերի 3-ի գիշերը ռուսական ուժերն Ուկրաինային հարվածել են տարբեր տեսակի 111 անօդաչու թռչող սարքերով։ Ժամը 8:00-ի դրությամբ՝ ՀՕՊ ուժերը երկրի հյուսիսում, հարավում և արևելքում խոցել են 83 անօդաչու թռչող սարք։
Գրանցվել է քսանյոթ անօդաչու թռչող սարքի հարված 13 վայրերում, ինչպես նաև անօդաչու թռչող սարքերի բեկորների անկում մեկ վայրում։ Հաշվետվության մեջ նշվում է, որ ամենաշատ վնասը կրել են Դնեպրոպետրովսկի, Զապորոժիեի, Խարկովի և Օդեսայի մարզերի քաղաքացիական ենթակառուցվածքները և մասնավոր տները։
Թարգմանությունը՝ Էմմա Չոբանյանի
