Ռուսաստանը պատրաստ է Եվրոպայի հետ պատերազմի. Պուտին

ԱՄՆ նախագահ Դոնալդ Թրամփի հատուկ բանագնաց Սթիվ Ուիթկոֆի հետ հանդիպումից առաջ լրագրողների հետ զրույցում Ռուսաստանի նախագահ Վլադիմիր Պուտինը հայտարարել է, որ եվրոպացիները հեռացել են բանակցային գործընթացից։

«Եվրոպացիները չեն լռում. նրանք նեղված են, որ դուրս են մղվել բանակցություններից։ Բայց ուզում եմ նշել, որ ոչ ոք նրանց դուրս չի մղել. նրանք իրենք են դա արել։ Որոշ ժամանակ մենք սերտ կապ ունեինք նրանց հետ, իսկ հետո հանկարծ նրանք կտրուկ խզեցին կապը Ռուսաստանի հետ։ Դա նրանց նախաձեռնությունն էր։ Ինչո՞ւ նրանք դա արեցին։ Որովհետև ընդունեցին Ռուսաստանին ռազմավարական պարտություն հասցնելու գաղափարը և, ըստ երևույթին, դեռևս ապրում են այդ պատրանքներով, չնայած իրենց մտքում գիտեն, որ դա վաղուց անցյալում է»,- ասել է Պուտինը։

Նա նշել է, որ եթե Եվրոպան հանկարծ պատերազմ սկսի Ռուսաստանի հետ, կարող է արագ ստեղծվել մի իրավիճակ, երբ Մոսկվան չի ունենա ոչ ոքի՝ բանակցելու համար։

«Ռուսաստանը մտադիր չէ պատերազմել եվրոպական երկրների հետ, բայց եթե Եվրոպան պատերազմ սկսի, Ռուսաստանը պատրաստ է հենց հիմա։ Եթե Եվրոպան հանկարծ պատերազմ սկսի մեզ հետ, կարծում եմ՝ դա շատ արագ տեղի կունենա։ Դա Ուկրաինա չէ։ Ուկրաինայի հետ մենք գործում ենք վիրաբուժական, զգուշորեն»,- հայտարարել է ՌԴ նախագահը։

Նա նաև սպառնացել է «կտրել Ուկրաինան ծովից» և ընդլայնել ուկրաինական նավահանգիստների ու նավերի ուղղությամբ հարվածների շրջանակը՝ ի պատասխան Կիևի կողմից Սև ծովում լցանավերի վրա հարձակումների։

«Ամենարմատական ​​տարբերակն Ուկրաինան ծովից կտրելն է, այդ դեպքում ծովահենությունը սկզբունքորեն անհնար կլինի», – ասել է Պուտինը՝ խոստանալով միջոցառումներ։

«Հուսով եմ, որ Ուկրաինայի ռազմական ղեկավարությունը, քաղաքական ղեկավարությունը և նրանց հետևում կանգնածները կքննարկեն՝ արդյո՞ք արժե շարունակել այս պրակտիկան»,- հավելել է Ռուսաստանի նախագահը։

Թարգմանությունը՝ Էմմա Չոբանյանի