29.06.2026 | 21:27
Պուտինի սուրպերզբոսանավը 2022թ․ ի վեր առաջին անգամ հայտնվել է ռադարների էկրանին․ այն նկատել են Դանիայի ափերի մոտ
Ինդոնեզիայում, Թաիլանդում և Շրի Լանկայում ջրհեղեղների հետևանքով զոհերի թիվը գերազանցել է 1200-ը․ ավելի քան 800 մարդ անհետ կորած է
Քաղաքականություն
02.12.2025 | 17:05
Ինդոնեզիայում, Շրի Լանկայում և Թաիլանդում ջրհեղեղների ու սողանքների հետևանքով զոհերի թիվը գերազանցել է 1200-ը, ավելի քան 800 մարդ անհետ կորած է համարվում: Անցյալ շաբաթ սկսված մուսսոնային անձրևները գետերի ափերից դուրս գալու պատճառ են դարձել ամբողջ տարածաշրջանում՝ ոչնչացնելով ենթակառուցվածքները և հեղեղելով քաղաքները, գրում է Current time-ը։
Վերջին տվյալների համաձայն՝ Ինդոնեզիայում զոհվել է 659 մարդ, Շրի Լանկայում՝ 390, իսկ Թաիլանդում՝ 181: Ինդոնեզիան ամենաշատն է տուժել, փրկարարները դժվարանում են հասնել Սումատրա կղզու գյուղեր, որտեղ ճանապարհները ողողվել են, իսկ կամուրջները՝ քանդվել: Իշխանությունները հայտարարել են, որ եղանակային պայմանների վատթարացումը բարդացնում է փրկարարական աշխատանքները: Ընդհանուր առմամբ, երկրում ջրհեղեղներից տուժել է 3,2 միլիոն մարդ:
Թաիլանդում ջրհեղեղներից տուժել են ավելի քան 1,5 միլիոն տնային տնտեսություններ և 3,9 միլիոն մարդ։ Ըստ տեղեկությունների՝ իշխանություններն աշխատում են վերականգնել ենթակառուցվածքները, այդ թվում՝ ջրամատակարարումը և էլեկտրաէներգիան։
Ըստ The Guardian-ի՝ մուսսոնային անձրևների սեզոնը հաճախ ուղեկցվում է ուժեղ անձրևներով, որոնք կարող են սողանքներ և ջրհեղեղներ առաջացնել, սակայն այս տարվա տեղատարափ անձրևները սրվել են Մալակկայի նեղուցում ձևավորված հազվագյուտ արևադարձային փոթորկի պատճառով։
ԱՀԿ-ն հայտարարել է, որ տարածաշրջան է ուղարկում արագ արձագանքման խմբեր և առաջին անհրաժեշտության պարագաներ, ինչպես նաև ուժեղացնում է համաճարակաբանական հսկողությունը։
Թարգմանությունը՝ Էմմա Չոբանյանի
