Թուրքերի համար Ադրբեջանն առաջին բարեկամ երկիրն է. ՀՀ-ն վերջինն է հարցվածների շրջանում

Europoll-ը սոցիալական հարցման արդյունքում դասակարգել է Թուրքիայի բարեկամ և թշնամի երկրները։ Հարցումը ցույց է տվել Թուրքիայի հանրության կողմից ամենաշատ բարեկամ ընկալվող երկրները, ինչպես նաև ցուցակի վերջին հորիզոնականում գտնվող երկիրը։ Թուրքիայի բարեկամական և թշնամական երկրների ընկալումը կարող է պարբերաբար փոխվել՝ կախված կառավարության քաղաքականությունից կամ ազգային շահերից, ասվում է հրապարակման մեջ:

Թուրքիայի արտաքին քաղաքականության ընկալման վերաբերյալ ուսումնասիրությունը բացահայտել է այն երկրների վարկանիշը, որոնց հանրությունը համարում է «բարեկամական»:

EuroPoll Statistics-ի կողմից անցկացված ուսումնասիրության մեջ մասնակիցներին մեկ առ մեկ կարդացել են 20 երկրների անունները և տրվել է հետևյալ հարցը՝ «Դուք այս երկիրը համարո՞ւմ եք Թուրքիայի բարեկամ»։

Արդյունքների համաձայն՝ Ադրբեջանը թուրքական հասարակության շրջանում առաջին բարեկամական երկիրն է՝ 94,2 տոկոսով։ Հայաստանին բարեկամ է համարել հարցվածների 3,3 տոկոսը։ Հայաստանը 20 երկրների շարքում վերջին տեղում է։

Առավել բարեկամական համարվող հինգ երկրներն են՝ Ադրբեջանը (94,2 տոկոս), Հարավային Կորեան (90 տոկոս), Ճապոնիան (89,4 տոկոս), Իտալիան (70,7 տոկոս) և Ռուսաստանը (62,1 տոկոս):

Ամենից քիչ բարեկամական երկրներն են՝ Հայաստանը (3,3 տոկոս), Իսրայելը (8,2 տոկոս), Ֆրանսիան (9,6 տոկոս), Մեծ Բրիտանիան (11,4 տոկոս) և ԱՄՆ-ը (17,2 տոկոս):

Թարգմանությունը՝ Էմմա Չոբանյանի