ԵՄ-ն պատժամիջոցներ է պատրաստում Բելառուսի դեմ՝ Լիտվայի նկատմամբ հիբրիդային հարձակումների պատճառով

Եվրոպական հանձնաժողովի նախագահ Ուրսուլա ֆոն դեր Լեյենը հայտարարել է, որ Եվրամիությունը նոր պատժամիջոցներ կկիրառի Բելառուսի նկատմամբ՝ ի պատասխան Լիտվայի դեմ հիբրիդային հարձակումների, գրում է DW-ի ռուսական ծառայությունը:

«Բելառուսի հետ սահմանին իրավիճակը սրվում է, քանի որ ավելի ու ավելի շատ մաքսանենգ օդապարիկներ են մտնում Լիտվայի օդային տարածք»,- գրել է նա X սոցիալական ցանցում Լիտվայի նախագահ Գիտանաս Նաուսեդայի հետ բանակցություններից հետո։

Բելառուսի իշխանությունների և երկրի առաջնորդ Ալեքսանդր Լուկաշենկոյի գործողությունները ֆոն դեր Լեյենն անվանել է «լիովին անընդունելի» և «լիակատար համերաշխություն» հայտնել Լիտվայի հետ, որը նախկինում փակել էր իր սահմանը Բելառուսի հետ՝ ծխախոտով օդապարիկների շարունակական ներխուժման ֆոնին։

Նույն օրը ԵՄ դիվանագիտական ​​առաքելությունը կանչել էր Բելառուսի ներկայացուցչին Բրյուսելում: Լիտվայի արտաքին գործերի նախարարության խոսնակը հայտարարել է, որ Մինսկը պետք է դադարեցնի հիբրիդային հարձակումները: Անցյալ հանգստյան օրերին Վիլնյուսի օդանավակայանը կրկին դադարեցրել էր գործունեությունը Բելառուսից ժամանող օդապարիկների պատճառով։

Բելառուսը, իր հերթին, կանչել է Լիտվայի գործերի ժամանակավոր հավատարմատար Էրիկաս Վիլկանեցասին՝ անօդաչու թռչող սարքի վթարի կապակցությամբ: Դիվանագետին բողոքի նոտա է փոխանցվել նոյեմբերի 30-ին Լիտվայից անօդաչու թռչող սարքի (ԱԹՍ) կողմից Բելառուսի պետական ​​սահմանի խախտման կապակցությամբ, հայտարարել է Մինսկի արտաքին գործերի նախարարությունը։

ԱԹՍ-ի տեսագրությունները և նավիգացիոն տվյալները վերանայելուց հետո պարզվել է, որ սարքը Բելառուսի վրայով թռիչքից հետո պետք է վերադառնար Լիտվա, հայտարարել է Բելառուսի ԱԳՆ-ն՝ Վիլնյուսին մեղադրելով սադրանքի և միջազգային իրավունքի խախտման մեջ։

Լիտվայի պետական ​​սահմանապահ ծառայության տվյալներով՝ 2025 թվականի սկզբից ի վեր երկրում գրանցվել են, այսպես կոչված, մետեոօդապարիկների անցման հարյուրավոր դեպքեր, որոնք մաքսանենգներն օգտագործում են սահմանով ծխախոտ անցկացնելու համար: Աշնանը օդապարիկները սկսել են ուղիղ թռչել դեպի Վիլնյուսի և Կաունասի միջազգային օդանավակայաններ, ինչը ստիպել է բազմիցս սահմանափակումներ մտցնել թռիչքների վերաբերյալ։

Այս հարձակումներին ֆոնին, Լիտվայի իշխանությունները հոկտեմբերի վերջին ժամանակավորապես փակել էին Բելառուսի հետ ցամաքային սահմանը։ Դրանից հետո Բելառուսի իշխանություններն արգելել էին լիտվական համարանիշներով բեռնատարների մուտքը Եվրոպա։ Սահմանը վերաբացվել է նոյեմբերին։

Թարգմանությունը՝ Էմմա Չոբանյանի