15.02.2026 | 19:50
ԱՄՆ-ը կասկածի տակ չի դնում եվրոպական երկրների եզրակացությունները Նավալնիի էպիբատիդինով թունավորման վերաբերյալ․ Մարկո Ռուբիո
ԵՄ-ն արձագանքել է Ադրբեջանի ընդդիմության առաջնորդի կալանավորմանը
Քաղաքականություն
02.12.2025 | 15:23
Եվրամիությունը (ԵՄ) կապ կհաստատի ադրբեջանական կողմի հետ՝ կապված ընդդիմադիր «Ժողովրդական ճակատ» կուսակցության առաջնորդ Ալի Քերիմլիի կալանավորման հետ։ Այս մասին հայտարարել է ԵՄ արտաքին գործերի և անվտանգության քաղաքականության ծառայության խոսնակ Անիտա Հիփերը՝ ի պատասխան «Ազատություն» ռադիոկայանի ադրբեջանական ծառայության հարցման։
«Մենք ակնկալում ենք, որ Ադրբեջանը կկատարի իր միջազգային պարտավորությունները, այդ թվում՝ Մարդու իրավունքների մասին եվրոպական կոնվենցիան։ Մեղադրյալին պետք է տրամադրվի անկախ իրավաբանական օգնություն և համարժեք բժշկական օգնություն»,- ասվում է հայտարարության մեջ։
ԵՄ խոսնակը նշել է, որ կազմակերպությունն ուշադիր կհետևի զարգացումներին։
Ավելի վաղ Բաքվի Սաբայիլի շրջանային դատարանը որոշում էր կայացրել 2 ամիս 15 օր ժամկետով կալանավորել Ալի Քերիմլիին։ Նրան մեղադրանք է առաջադրվել Ադրբեջանի քրեական օրենսգրքի 278.1 հոդվածով (իշխանությունը բռնի զավթելու կամ պետության սահմանադրական կարգը բռնի կերպով փոխելուն ուղղված գործողություններ):
Ընդդիմությունը պնդում է, որ իշխանությունները նպատակային արշավ են իրականացնում բոլոր անկախ քաղաքական ուժերը վերացնելու համար։ Ալի Քերիմլիի և այլ ակտիվիստների ձերբակալությունները դիտվում են որպես կուսակցության քաղաքական գործունեությունը վերջնականապես կաթվածահար անելու փորձ։
Թարգմանությունը՝ Էմմա Չոբանյանի
