«Կընդունենք ԵՄ-Հայաստան նոր ռազմավարական օրակարգը». Մարթա Կոսը մանրամասներ է հայտնել վիզաների ազատականացման և ԵՄ աջակցության մասին

Բրյուսելում կայանալիք ԵՄ-Հայաստան գործընկերության խորհրդի 6-րդ նիստում կընդունվի երկկողմ գործընկերության նոր ռազմավարական օրակարգը։ Այս մասին Բրյուսելում հայ լրագրողների հետ հանդիպմանը հայտնեց ԵՄ ընդլայնման հարցերով հանձնակատար Մարթա Կոսը։

Եվրոպացի բարձրաստիճան պաշտոնյան ընդգծեց, որ Հայաստանի և ԵՄ-ի հարաբերություններն այսօր «ավելի սերտ են, քան երբևէ», և անդրադարձավ մի քանի առանցքային ուղղությունների՝ վիզաների ազատականացումից մինչև անվտանգություն և ֆինանսական աջակցություն։

Մարթա Կոսը Բրյուսելում  հայտնեց, որ ստորագրվելիք փաստաթուղթը  անվտանգային, պաշտպանական բաղադրիչներ է ներառում՝ առանց մանրամասներ նշելու։

Վիզաների ազատականացում. գործողությունների ծրագիրը փոխանցված է

Մարթա Կոսը տեղեկացրեց, որ Եվրամիությունը ՀՀ կառավարությանն է փոխանցել Վիզաների ազատականացման գործողությունների ծրագիրը (Action Plan)։ Նա, սակայն, զգուշացրեց, որ դա գործընթաց է, որը չի լինում «այսօրվանից վաղը» և կարող է տևել տարիներ։

«Վիզաների ազատականացումը չի նշանակում միայն ճամփորդության թույլտվություն։ Մենք պետք է վստահ լինենք, որ Հայաստանը կկարողանա վերահսկել սահմանները, փոխանակել տվյալներ և փաստաթղթեր»,– նշեց հանձնակատարը՝ հավելելով, որ ԵՄ «Աճի ծրագրով» նախատեսված ֆինանսավորման զգալի մասն ուղղվելու է հենց այս բարեփոխումներին։

12 մլն եվրո՝ ընտրություններին ընդառաջ և պայքար ապատեղեկատվության դեմ

Անդրադառնալով Հայաստանում 2026 թվականին սպասվող ընտրություններին՝ Կոսը հայտարարեց, որ ԵՄ-ն 12 միլիոն եվրո է նախատեսել՝ աջակցելու Հայաստանին ապատեղեկատվության (FIMI), կիբերանվտանգության սպառնալիքների դեմ պայքարում և ռազմավարական հաղորդակցության զարգացման գործում։

«Մենք չգիտենք, թե ինչպիսին կլինեն ձեր ընտրությունների արդյունքները, բայց հույս ունենք, որ Հայաստանը կմնա ուժեղ ժողովրդավարական երկիր և չի գնա ավտոկրատիայի ուղղությամբ։ Մենք տեսել ենք՝ ինչ է լինում, երբ թույլ ենք տալիս ավտոկրատական ռեժիմներին վնասել ժողովրդավարությանը»,– ասաց նա։

Վանիկ Հակոբյան