Լիբանանի դեսպանն իր հավատարմագրերն է հանձնել ՀՀ նախագահին

Հայաստանի նախագահ Վահագն Խաչատուրյանին հավատարմագրեր է հանձնել Լիբանանի նորանշանակ դեսպան Դիմա Հադդադը․ հանդիպման ընթացքում կողմերը կարևորել են երկու երկրների միջև պատմական բարեկամության վրա հիմնված հարաբերությունների զարգացումն ու տարբեր ոլորտներում համագործակցության ընդլայնումը։ Այս մասին տեղեկացնում են նախագահի աշխատակազմից։

Ըստ հերատեսչության՝ դեսպանը շնորհակալություն է հայտնել ընդունելության համար և փոխանցել Լիբանանի նախագահի ողջույններն ու բարեմաղթանքները։

«Հանդիպման ընթացքում շեշտվել է, որ Հայաստանի և Լիբանանի հարաբերությունները հիմնված են պատմական բարեկամության, մշակութային ընդհանրությունների և փոխադարձ հարգանքի վրա։ Ընդգծվել է արդյունավետ համագործակցությունը, այդ թվում՝ բազմակողմ ձևաչափերում, և նշվել է, որ Լիբանանը տարածաշրջանում Հայաստանի կարևոր գործընկերներից է։

Քննարկվել են երկկողմ փոխգործակցության ընդլայնման հնարավորությունները՝ ընդհանուր հետաքրքրություն ներկայացնող ոլորտներում։ Կարևորվել են քաղաքական երկխոսության խթանման ուղղությամբ ջանքերի ներդրումը և գործնական կապերի ամրապնդումը։

Կողմերը նաև ընդգծել են քաղաքական և ինստիտուցիոնալ համագործակցության և առկա մեծ ներուժի իրականացման, ու միջմշակութային ու պատմական կապերի պահպանման և զարգացման կարևորությունը։

Դեսպան Դիմա Հադդադը իր հերթին հավաստիացրել է, որ կնպաստի երկկողմ կապերի ամրապնդմանը և նոր նախաձեռնությունների առաջխաղացմանը»,- ասված է հաղորդագրությունում։