Նոբելյան մրցանակի դափնեկիրները խնդրել են Ուկրաինայի խաղաղության ծրագրում քաղբանտարկյալների ազատ արձակման վերաբերյալ կետ ներառել

Նոբելյան մրցանակակիրների մի խումբ Միացյալ Նահանգների, Ռուսաստանի, Ուկրաինայի ու Եվրամիության առաջնորդներին կոչ է արել Ուկրաինայում ապագա խաղաղության համաձայնագրերը կապել քաղբանտարկյալների ազատ արձակման հետ։

«Ամենակարևոր քայլը պետք է լինի հրադադարը։ Պետք է հաջորդեն բանակցությունները և ռազմական փոխանակումները։ Մենք խնդրում ենք, որ խաղաղության համաձայնագրի նախագծում ներառվի միջազգային կազմակերպությունների կողմից քաղբանտարկյալ ճանաչված քաղաքացիական անձանց ներում շնորհելու կամ փոխանակելու մասին կետ»,- ասվում է  հրապարակված բաց նամակում, որը ստորագրել են Նոբելյան մրցանակի 17 դափնեկիրներ, գրում է DW-ի ռուսական ծառայությունը։

Փաստաթղթում, որը բաց է ստորագրման համար, նշվում է, որ քաղբանտարկյալների ազատ արձակման վերաբերյալ կետը պետք է վերաբերի հիմնականում հիվանդներին, տարեցներին, կանանց և դեռահասներին։

Այն նաև ընդգծում է. «Բոլոր կողմերի համար շահավետ հետագա համաձայնագրերի կնքումը պետք է ուղղակիորեն կապված լինի քաղաքացիական բանտարկյալների ազատ արձակման հետ»։

Քաղաքական առաջնորդներին ուղղված նամակում նշվում է, որ Ռուսաստանի բանտերում պահվում են հակապատերազմական դիրքորոշումների համար դատապարտված ավելի քան 1000 մարդ, և «Մեմորիալ» մարդու իրավունքների կենտրոնը նրանց ճանաչել է որպես քաղբանտարկյալներ։

«Մենք համոզված ենք, որ եթե պարոնայք Պուտինը և Զելենսկին ցուցաբերեն բարի կամք և փոխադարձաբար ներում շնորհեն առնվազն մի քանի տասնյակ մարդկանց, որոնք բանտարկվել են միայն իրենց անձնական կարծիքն արտահայտելու համար և չեն կատարել բռնի հանցագործություններ, դա կարագացնի երկարատև և արդար խաղաղության հաստատումը։ Մարդկային կյանքի անգնահատելի արժեքի մասին բանակցողների կողմից բացարձակապես միանշանակ հայտարարությունները պետք է դառնան երկարատև խաղաղության հիմքը։ Մենք համոզված ենք, որ մարդու իրավունքները, և դրանցից ամենակարևորը՝ կյանքի իրավունքը, արժանապատվության իրավունքը և ազատության իրավունքը, պետք է լինեն քաղաքականության կենտրոնում»,- ասվում է հայտարարությունում։

Դիմումը ստորագրած Նոբելյան մրցանակակիրների թվում են 2015 թվականի գրականության Նոբելյան մրցանակի դափնեկիր Սվետլանա Ալեքսիևիչը և 2021 թվականի Նոբելյան խաղաղության մրցանակի դափնեկիր Դմիտրի Մուրատովը։

Թարգմանությունը՝ Էմմա Չոբանյանի