18.05.2026 | 23:42
«Անկախ դիտորդ»-ը պահանջում է ազատ արձակել Արթուր Օսիպյանին և պարզաբանում տալ նրա ձերբակալության հիմքերի վերաբերյալ
Աշխարհի խոշորագույն զենք արտադրողների համակցված եկամուտը մեկ տարում հասել է ռեկորդային 679 միլիարդ դոլարի. SIPRI
Քաղաքականություն
01.12.2025 | 22:45
Աշխարհի 100 խոշորագույն զենք արտադրողների համակցված եկամուտը 2024 թվականին աճել է 5,9%-ով՝ հասնելով ռեկորդային 679 միլիարդ դոլարի՝ ըստ Ստոկհոլմի միջազգային խաղաղության հետազոտությունների ինստիտուտի (SIPRI) կողմից դեկտեմբերի 1-ին հրապարակված զեկույցի։ Այս գումարի գրեթե կեսը՝ 334 միլիարդ դոլարը, բաժին է ընկել 39 ամերիկյան ընկերությունների, փոխանցում է The Insider-ը։
«Անցյալ տարի զենքի վաճառքից համաշխարհային եկամուտները հասել են SIPRI-ի կողմից գրանցված ամենաբարձր մակարդակին, քանի որ արտադրողներն օգտվել են բարձր պահանջարկից»,- նշել է հետազոտողներից մեկը։
2018 թվականից ի վեր առաջին անգամ աշխարհի բոլոր հինգ խոշորագույն զենք արտադրող ընկերությունների՝ Lockheed Martin Corp. (ԱՄՆ), RTX (ԱՄՆ), Northrop Grumman Corp. (ԱՄՆ), BAE Systems (Մեծ Բրիտանիա) և General Dynamics Corp. (ԱՄՆ) եկամուտներն աճել են։ Վարկանիշում ընդգրկված երեք իսրայելական ընկերություններն իրենց համակցված եկամուտները մեծացրել են 16%-ով՝ հասցնելով 16,2 միլիարդ դոլարի։
Զեկույցում նշվում է, որ զենքի պահանջարկը մեծացել է Ուկրաինայում և Գազայում տեղի ունեցող պատերազմների պատճառով: Այս աճի հիմնական մասը բաժին է ընկել ԱՄՆ-ի և Եվրոպայի ընկերություններին: Միայն Ասիայում գրանցվել է անկում՝ չինական ռազմական արդյունաբերության խնդիրների պատճառով։
Տվյալների ոչ բավարարության պատճառով SIPRI-ի վարկանիշային աղյուսակում ընդգրկված են միայն երկու ռուսական զենք արտադրողներ՝ պետական «Ռոստեխ» կորպորացիան զբաղեցնում է յոթերորդ տեղը (27,12 միլիարդ դոլար), մինչդեռ Միացյալ նավաշինական կորպորացիան (ОСК)՝ 41-րդ տեղը (4,11 միլիարդ դոլար):
Վարկանիշային աղյուսակում միակ ուկրաինական ընկերությունը՝ պետական «Ուկրաինական պաշտպանական արդյունաբերությունը», զբաղեցնում է 52-րդ տեղը (3,01 միլիարդ դոլար):
Թարգմանությունը՝ Էմմա Չոբանյանի
