Ուկրաինայում կոռուպցիոն սկանդալը չի ​​օգնում պատերազմի ավարտին, բայց խաղաղության համաձայնագիր կնքելու «լավ հնարավորություն» կա. Թրամփ

Ֆլորիդայում ուկրաինական և ամերիկյան պատվիրակությունների միջև բանակցություններից հետո ԱՄՆ նախագահ Դոնալդ Թրամփը հայտարարել է, որ «լավ հնարավորություն» կա Ուկրաինայում պատերազմը դադարեցնելու համաձայնագիր  կնքելու համար, գրում է Meduza-ն։

Նախագահական Air Force One ինքնաթիռում լրագրողների հետ զրույցում Թրամփն ասել է, որ Ուկրաինան ունի «բարդ փոքր խնդիրներ»՝ կապված «կոռուպցիայի իրավիճակի հետ»։

«Նրանք կոռուպցիայի հետ կապված իրավիճակ ունեն, որը չի օգնում [պատերազմը դադարեցնելուն]: Բայց ես կարծում եմ, որ համաձայնագիր կնքելու լավ հնարավորություն կա»,- ասել է ԱՄՆ նախագահը։

ՌԲԿ Ուկրաինան, հղում անելով աղբյուրին, հաղորդել էր, որ Ֆլորիդայի բանակցություններում չի հաջողվել վերջնականապես մշակել խաղաղության համաձայնագրի նախագիծը, բայց դա «քայլ առաջ» էր։

«Բանակցություններն այնքան կենտրոնացած չէին Ժնևում համաձայնեցված շրջանակի, որքան մնացած խնդրահարույց հարցերի վրա։ Այսինքն՝ մենք չենք ասում, որ հիմա կա 100% ըմբռնում վերջնական տեքստի հետ կապված, բայց սա ևս մեկ քայլ առաջ էր»,- ասել է աղբյուրը։

ԱՄՆ-ն և Ուկրաինան բանակցություններ են անցկացրել նոյեմբերի 30-ին։ Հանդիպումից հետո ԱՄՆ պետքարտուղար Մարկո Ռուբիոն ասել է, որ բանակցությունները «շատ արդյունավետ և օգտակար» էին, բայց «դեռ շատ աշխատանք կա անելու»։ Ուկրաինական պատվիրակության ղեկավար Ռուստեմ Ումերովն էլ հանդիպումն անվանել է «արդյունավետ և հաջողված»։

ԱՄՆ նախագահի հատուկ բանագնաց Սթիվ Ուիթկոֆը դեկտեմբերի 1-ին կմեկնի Մոսկվա, որտեղ նախատեսված է նրա հանդիպումը ՌԴ նախագահ Վլադիմիր Պուտինի հետ։

Հավելենք, որ ավելի վաղ Ուկրաինայում կոռուպցիոն սկանդալի ֆոնին նախագահ Վլադիմիր Զելենսկիի գրասենյակի ղեկավար Անդրեյ Երմակը հրաժարականի դիմում էր գրել:

Թարգմանությունը՝ Էմմա Չոբանյանի