Ռուբիոն և Ումերովը Ֆլորիդայում Ուկրաինայի հարցով բանակցությունները «շատ արդյունավետ» են գնահատել

Ուկրաինայում պատերազմի ավարտի պայմանների վերաբերյալ Ֆլորիդայում ամերիկյան և ուկրաինական պատվիրակությունների միջև բանակցություններն ավարտվել են նոյեմբերի 30-ի երեկոյան։ ԱՄՆ պետքարտուղար Մարկո Ռուբիոն դրանք որակել է «շատ արդյունավետ», սակայն նշել, որ դեռ շատ աշխատանք կա անելու՝ Ուկրաինայի դեմ Ռուսաստանի պատերազմում խաղաղության հասնելու համար, գրում է DW-ի ռուսական ծառայությունը։

«Մենք ունեցանք ևս մեկ շատ արդյունավետ բանակցային նիստ՝ հիմնվելով Ժնևի բանակցությունների արդյունքների և այս շաբաթվա իրադարձությունների վրա: Այնուամենայնիվ, դեռ շատ աշխատանք կա անելու»,-ասել է ԱՄՆ պետքարտուղարը։

Նա հավելել է, որ Ռուսաստանը պետք է լինի «հավասարման մաս» կարգավորման վիճելի հարցերի լուծման գործում։ Ռուբիոն նաև հաստատել է, որ ԱՄՆ նախագահի հատուկ ներկայացուցիչ Սթիվ Ուիթկոֆը դեկտեմբերի 1-ին կմեկնի Մոսկվա։ Պետքարտուղարը լրագրողներին ասել է, որ ամերիկյան և ուկրաինական պատվիրակությունների միջև հանդիպումը կենտրոնացած էր ոչ միայն պատերազմի ավարտի, այլև երկարաժամկետ անվտանգության հարցերի վրա։

«Մենք ցանկանում ենք օգնել Ուկրաինային՝ ապահովել մշտական ​​անվտանգություն։ Ե, նույնքան կարևոր է, որ այնտեղ սկսվի  իրական բարգավաճման նոր դարաշրջան»,- ասել է նա։

Ուկրաինական պատվիրակության ղեկավար, երկրի Ազգային անվտանգության և պաշտպանության խորհրդի (ԱԱԽ) քարտուղար Ռուստեմ Ումերովը, իր հերթին, բանակցությունները որակել է «արդյունավետ և հաջողված»։

«Մեր նպատակը բարգավաճ, ուժեղ Ուկրաինան է։ Մենք քննարկել ենք Ուկրաինայի համար բոլոր կարևոր հարցերը։ Եվ Միացյալ Նահանգները շատ ուժեղ աջակցություն ցուցաբերեց», – ասել է նա։

Ումերովը, ինչպես Ռուբիոն, ասել է, որ Ֆլորիդայում հանդիպումը հիմնված էր Ուկրաինայի և Միացյալ Նահանգների միջև Ժնևում կայացած բանակցությունների վրա։ Նա նաև հայտնել է, որ Ուկրաինայի նախագահ Վլադիմիր Զելենսկիին զեկուցել է  Միացյալ Նահանգների հետ դիրքորոշումների մերձեցման մասին:

«Զգալի առաջընթաց է գրանցվել արժանապատիվ խաղաղության առաջխաղացման և մեր դիրքորոշումներնամերիկյան կողմի դիրքորոշումների հետ համաձայնեցնելու գործում»,- գրել է նա տելեգրամի իր ալիքում:

Ազգային անվտանգության և պաշտպանության խորհրդի քարտուղարը նշել է, որ Կիևի հիմնական նպատակները, ինչպիսիք են անվտանգությունը, ինքնիշխանությունը և հուսալի խաղաղությունը, մնում են անփոփոխ, և դրանք կիսում է ամերիկյան կողմը:

CNN-ը, հղում անելով տեղեկացված աղբյուրին, հաղորդում է, որ ամերիկյան և ուկրաինական պատվիրակությունների միջև Ֆլորիդայում բանակցությունները «կոշտ էին, բայց շատ կառուցողական»։ Լրատվամիջոցի աղբյուրի փոխանցմամբ՝ կողմերը քննարկել են ռուս-ուկրաինական հակամարտության կարգավորման «ամենազգայուն հարցերը»։ The Wall Street Journal-ն էլ հայտնել է, որ բանակցությունների թեմաներն են եղել տարածքային հարցերը և Ուկրաինայում ընտրությունների անցկացումը։

Թարգմանությունը՝ Էմմա Չոբանյանի