27.10.2026 | 23:30
Հայաստանի, Ադրբեջանի և Վրաստանի դեսպանները քննարկել են Հարավային Կովկասի խաղաղության և կայունության ամրապնդման հարցերը
Արման Ծառուկյանը չստացավ չեմպիոնության շանս․ UFC-ն այլ մենամարտ է նշանակել
28.11.2025 | 12:52
UFC-ի թեթև քաշային կարգի դասակարգման առաջատար Արման Ծառուկյանն առաջիկայում չի անցկացնի չեմպիոնական մենամարտ։ Թեթև քաշային կարգի գործող չեմպիոն Իլյա Տոպուրիան հայտարարել է, որ մինչև գարուն չի մենամարտելու, քանի որ ծանր շրջան է իր կյանքում։
«Ես չեմ պատրաստվում մենամարտեր անցկացնել 2026 թվականի առաջին եռամսյակում, քանի որ իմ անձնական կյանքում բարդ շրջան է։ Այդ պատճառով ցանկանում եմ կենտրոնանալ իմ երեխաների վրա և հնարավորինս արագ կարգավորել այս իրավիճակը։ Եվ չեմ ուզում կանգնեցնել դիվիզիոնը։ UFC-ն կկազմակերպի բոլոր անհրաժեշտ մենամարտերը, և հենց որ բոլոր խնդիրները լուծեմ, կհայտնեմ մատչմեյքերներին, որ պատրաստ եմ վերադառնալու»,- սոցցանցերում գրել է Իլյա Տոպուրիան։
UFC-ն իր հերթին պաշտոնապես հայտարարել է, որ հաջորդ մրցաշարի ժամանակ թեթև քաշային կարգի ժամանակավոր չեմպիոնի տիտղոսի համար կմենամարտեն ամերիկացի Ջասթին Գեյջին ու բրիտանացի Փեդի Փիմբլեթը։ Հաջորդ մեծ մրցաշարը UFC 324-ն է, որը կկայանա հունվարի 25-ին Լաս Վեգասում։ UFC-ի նախագահ Դենա Ուայթը նշել է, որ Գեյջի ու Փիմբլեթի մենամարտի հաղթողը տիտղոսը կվիճարկի Իլյա Տոպուրիայի հետ։
Արման Ծառուկյանը ևս արձագանքել է ստեղծված իրավիճակին․ «Բացատրեք, թե ինչպես սա ընդհանրապես կարելի է հասկանալ։ Նպատակը շարունակում է մնալ նույնը։ Մենք կվերցնենք այն, ինչ մեզ է պատկանում։ Ամեն ինչ իր ժամանակին»,- սոցցանցերում գրել է հայ մարտիկը։
Հիշեցնենք, որ օրեր առաջ Ծառուկյանը Դոհայում կայացած UFC Fight Night 265 մրցաշարի գլխավոր մենամարտում խեղդող հնարքով ժամկետից շուտ հաղթել էր նորզելանդացի Դեն Հուկերին և դարձել թեթև քաշային կարգում չեմպիոնության հավակնորդ։ 29-ամյա հայ մարտիկը խառը մենամարտերում անցկացրել է 26 հանդիպում, տարել 23 հաղթանակ ու կրել 3 պարտություն։
