Հասարակություն
28.11.2025 | 13:24
ՀՔԱՎ գրասենյակից հայտնում են, որ 2025թ․ նոյեմբերի 26-ին ՀՀ Վերաքննիչ դատարանը մերժել է Նարեկ Մալյանի բողոքը՝ ուժի մեջ թողնելով առաջին ատյանի դատարանի՝ ՀՔԱՎ-ի օգտին կայացված վճիռը․ այն է Ն․ Մալյանից հօգուտ Արթուր Սաքունցի բռնագանձել 400.000 ՀՀ դրամ՝ որպես զրպարտության համար հասցված ոչ նյութական վնասի հատուցման գումար:
«2025թ․ փետրվարի 4-ին Կոտայքի մարզի Առաջին ատյանի ընդհանուր իրավասության դատարանը 6 տարի ձգվող դատական քննությունից հետո կայացրել էր վճիռ՝ մասնակի բավարարել Արթուր Սաքունցի հայցն ընդդեմ Նարեկ Մալյանի։ Դատարանը որոշել էր Մալյանից հօգուտ Ա. Սաքունցի բռնագանձել 400.000 ՀՀ դրամ՝ որպես զրպարտության համար հասցված ոչ նյութական վնասի հատուցման գումար:
Հիշեցնենք, որ 2019 թվականին Նարեկ Մալյանը իր ֆեյսբուքյան էջում հրապարակել էր գրառում, որով ապատեղեկատվություն էր տարածել ՀՔԱ Վանաձորի գրասենյակի նախագահ Արթուր Սաքունցի հասցեին՝ արատավորելով վերջինիս անձն ու արժանապատվությունը, հանրության մոտ սխալ կարծիք ստեղծելով Ա․ Սաքունցի անձի մասին։ Մասնավորապես, Մալյանը ֆեյսբուքյան գրառման մեջ նշել էր․
Մալյանը նույնիսկ հին տեսանյութի կոնտեքստից կտրված հատված էր հրապարակել և այն վերնագրել՝ «Սորոսի վաստակ Արթուր Սաքունցը առաջարկում է հանձնել ազատագրված տարածքները»։
Վերաքննիչ դատարանի այս որոշումը ցույց է տալիս, որ զրպարտությունը, կեղծ մեղադրանքներն ու մանիպուլյացիոն տեղեկատվությունը չեն կարող մնալ անհետևանք, իսկ անձի պատիվն ու արժանապատվությունը պաշտպանելը՝ իրավական և հանրային պարտադիր արժեք է։
Վերաքննիչ քաղաքացիական դատարանի որոշումը մեկ ամսվա ընթացքում կարող է բողոքարկվել ՀՀ վճռաբեկ դատարան»,- ասված է հաղորդագրությունում։
