10.01.2026 | 20:05
Անի Ամիրաղյանը պարտվել է Կատարինա Զավացկային
Հրդեհների հետևանքով բազմաթիվ վայրի կենդանիներ լքել են իրենց բնական միջավայրը և կարող են հայտնվել բնակելի հատվածներին մոտ. ՇՄ նախարար
27.11.2025 | 23:53
Շրջակա միջավայրի նախարար Համբարձում Մաթևոսյանը այցելել է Տավուշի մարզ՝ տեղում գնահատելու «Դիլիջան» ազգային պարկում և հարակից տարածքներում տեղի ունեցած հրդեհների հետևանքները։ Նախարարը շնորհակալություն է հայտնել հրդեհաշիջմանը ներգրավված ծառայություններին, հանձնարարել ուժեղացնել կանխարգելիչ աշխատանքները և նախազգուշացրել, որ հրդեհների պատճառով վայրի կենդանիները կարող են մոտենալ բնակավայրերին՝ կոչ անելով քաղաքացիներին նման դեպքերում անմիջապես դիմել համապատասխան ծառայություններին։ Այս մասին հայտնում են նախարարության մամուլի ծառայությունից։
Նախարարը բնության հատուկ պահպանվող տարածքների կառավարման պատասխանատուներին հանձնարարել է ուժեղացնել բնակչության շրջանում իրականացվող իրազեկման ու բացատրական աշխատանքները՝ կանխարգելման միջոցառումների արդյունավետությունն առավել բարձրացնելու համար։
«Բացի հակահրդեհային կանոնների խստագույն պահպանման անհրաժեշտությունը, մենք կանգնած ենք մեկ կարևոր խնդրի առաջ ևս․ անտառային հրդեհների հետևանքով բազմաթիվ վայրի կենդանիներ լքել են իրենց բնական միջավայրը և կարող են հայտնվել համայնքներին կամ բնակելի հատվածներին մոտ»,- նշել է նախարար Մաթևոսյանը:
«Հարգելի քաղաքացինե´ր, նման դեպքերում խնդրում ենք անհապաղ դիմել համապատասխան ծառայություններին՝ ապահովելու ինչպես մարդկանց, այնպես էլ կենդանիների անվտանգությունը։ Նախարարը այցելել է նաև հրդեհաշիջման աշխատանքների համար ստեղծված օպերատիվ արձագանքման շտաբ: Գույքագրված խնդիրներին հնարավոր սեղմ ժամկետում կտրվեն լուծումներ»,- ասվում է նախարարության տարածած հաղորդագրությունում:
Ավելի վաղ ՆԳՆ Փրկարար ծառայությունից տեղեկացրել էին, որ ՆԳՆ Փրկարար ծառայության օպերատիվ և համակարգված միջոցառումների արդյունքում Դիլիջանի ոլորանների, Նավուր համայնքի և «Լեռնային Հայաստան» առողջարանի մոտակա անտառային հատվածներում բռնկված հրդեհները ամբողջությամբ մարված են։
