31.10.2026 | 14:18
Հայաստանի և Ֆրանսիայի փրկարար ծառայությունները կշարունակեն համագործակցությունը
Բաքվում Արցախի ղեկավարների շինծու գործերով նիստում փաստաբանները պաշպանական ճառերով են հանդես գալիս
Քաղաքականություն
27.11.2025 | 20:39
Բաքվի զինվորական դատարանում ընթանում է Արցախի ղեկավարների ու այլ պաշտոնյաների նկատմամբ հարուցված շինծու գործերով հերթական դատական նիստը։ Ադրբեջանական լրատվամիջոցների հաղորդմամբ՝ նիստի ընթացքում սկսվել են հայ գերիների փաստաբանների պաշտպանական ճառերը։
Գուրգեն Ստեփանյանի փաստաբան Զումրուդ Սամեդովան հիշեցրել է, որ պետական մեղադրանքը պաշտպանող դատախազը դատարանից խնդրել է Ստեփանյանին դատապարտել 16 տարվա ազատազրկման: Փաստաբանը նշել է, որ Ստեփանյանը չի ընդունում իրեն առաջադրված մեղադրանքը:
Նրա խոսքով՝ Գուրգեն Ստեփանյանը, ինչպես նա նշել է դատավարության ընթացքում տված ցուցմունքում, 2005-2007 թվականներին ծառայել է Հադրութում և 2023 թվականին ուղարկվել է մարտական դիրք: Փաստաբանը նշել է, թե 2023 թվականի սեպտեմբերի 19-ին նա լքել է իր դիրքը, փախել Ստեփանակերտ քաղաք և ճանապարհին հանդիպելով Ադրբեջանի զինված ուժերի զինծառայողների, հանձնվել է նրանց:
«Որպես պաշտպանության կողմ՝ կարծում եմ, որ Ադրբեջանի Հանրապետության քրեական դատավարության օրենսգրքի 42.1.4 հոդվածի հիման վրա մեղադրյալը պետք է արդարացվի ապացույցների բացակայության հիմքով։ Հետևաբար, խնդրում եմ դատարանին՝ առաջնորդվելով այս հոդվածով, արդարացնել մեղադրյալին»,- հավելել է փաստաբանը։
Հավելենք, որ դատական նիստը շարունակվում է։
Թարգմանությունը՝ Էմմա Չոբանյանի
