28.04.2026 | 15:55
Մեկ շաբաթից կտեսնենք նաև Ֆրանսիայի հետ երկար բանակցված փաստաթղթի ստորագրումը
Էրդողանն ու Հռոմի պապը համաշխարհային խաղաղության հարցեր են քննարկել
Քաղաքականություն
27.11.2025 | 21:12
Թուրքիայի նախագահ Ռեջեփ Թայիփ Էրդողանը Հռոմի պապ Լևոն XIV-ի հետ համաշխարհային խաղաղությունն ու կայունությունն է քննարկել, գրում է Daily Sabah-ը։
«Ռուսաստան-Ուկրաինա հակամարտության վերաբերյալ Հռոմի պապի խաղաղության և դիվանագիտության կոչերը իմաստալից են։ Մենք [Վատիկանի հետ] համատեղ կաշխատենք Արևելյան Երուսաղեմի սրբազան կարգավիճակի ցանկացած խախտման դեմ»,- ասել է Էրդողանը։
Իր հերթին, Հռոմի պապ Լևոն XIV-ը հույս է հայտնել, որ Թուրքիան կմնա կայունության և խաղաղության աղբյուր։ Պապը նշել է, որ աշխարհն ականատես է լինում հակամարտության բարձր մակարդակի։
«Մարդկության ապագան վտանգված է»,- զգուշացրել է նա։
Լևոն XIV-ը նաև գովաբանել է թուրքական մշակույթը, երբ ընդգծել է ընտանիքի կարևորությունը։
Էրդողանը ողջունել է Հռոմի պապի «խոհեմ դիրքորոշումը» պաղեստինյան հարցի վերաբերյալ և հույս հայտնել, որ այցն օգտակար կլինի մարդկության համար լարվածության և անորոշության այս ժամանակաշրջանում։
Սա Հռոմի պապի առաջին պաշտոնական արտասահմանյան այցն է կաթոլիկ եկեղեցու առաջնորդ ընտրվելուց հետո։ Էրդողանը նախագահական համալիրում պապի հետ անձնական հանդիպում է ունեցել շուրջ կես ժամ։ Հանդիպման ընթացքում երկու առաջնորդները քննարկել են Թուրքիա-Վատիկան հարաբերությունները, ինչպես նաև տարածաշրջանային և համաշխարհային զարգացումները՝ հատուկ ուշադրություն դարձնելով Պաղեստինում տիրող իրավիճակին։ Ըստ թուրքական կողմի՝ հանդիպման օրակարգում է եղել նաև Պաղեստինում Իսրայելի կողմից իրականացվող ցեղասպանությունը, Մերձավոր Արևելքում խաղաղություն հաստատելու ջանքերը և ավելի լայն միջազգային հարցեր։
Մինչ այդ, Հռոմի պապը հարգանքի տուրք է մատուցել Անկարայում գտնվող Մուստաֆա Քեմալ Աթաթուրքի դամբարանում։
Թարգմանությունը՝ Էմմա Չոբանյանի
