12.01.2026 | 01:05
«Բարսելոնան» հաղթեց «Ռեալին» ու դարձավ Իսպանիայի սուպերգավաթակիր․ ՏԵՍԱՆՅՈՒԹ
Հռոմի պապը Թուրքիա է ժամանել․ ընդունելությանը կմասնակցի նաև Պոլսի Հայոց պատրիարքը
Քաղաքականություն
27.11.2025 | 15:20
Հռոմի պապ Լևոն XIV-ն առաջին արտասահմանյան ուղևորության շրջանակում մեկնել է Թուրքիա և Լիբանան։ Նա Անկարա է ժամանել։ DW-ի հաղորդմամբ՝ օդանավակայանում պատվո պահակախմբի ներկայությամբ Հռոմի պապին դիմավորել է մշակույթի և զբոսաշրջության նախարար Մեհմեթ Նուրի Էրսոյը՝ այլ պաշտոնյաների ու եկեղեցական բարձրաստիճան գործիչների հետ:
Այս ուղևորությունը դիտարկվում է որպես քրիստոնեության և իսլամի ներկայացուցիչների միջև հարաբերություններն ամրապնդելու հնարավորություն։ Ուշադրության կենտրոնում է քրիստոնեության առաջին էկումենիկ՝ Նիկեայի ժողովի 1700-ամյակը։
«Սա շատ կարևոր ուղևորություն է, քանի որ մենք դեռ շատ բան չգիտենք Լևոն XIV-ի աշխարհաքաղաքական հայացքների մասին, և սա նրա համար առաջին մեծ հնարավորությունն է՝ դրանք հստակեցնելու»,- Reuters գործակալությանն ասել է իտալացի գիտնական Մասիմո Ֆաջոլին։
Հռոմի պապն Անկարայում կհանդիպի Թուրքիայի նախագահ Ռեջեփ Թայիփ Էրդողանի հետ, այնուհետև կմեկնի Ստամբուլ՝ տեսնելու Կապույտ մզկիթը։ Մզկիթի իմամ Ասգին Թունջան ասել է, որ այցը կնպաստի քրիստոնյա-մուսուլմանական կապերին և կվերացնի իսլամի վերաբերյալ նախապաշարմունքները։
Հավելենք, որ Հռոմի պապը Թուրքիա ուղևորության ժամանակ նաև Ստամբուլի հայկական եկեղեցի կայցելի։
Պոլսի Հայոց պատրիարքարանն էլ հայտնում է, որ պատրիարք Սահակ արքեպիսկոպոս Մաշալյանը Թուրքիայի նախագահ Ռեջեփ Թայիփ Էրդողանի հրավերով մեկնում է Անկարա։ Նա կմասնակցի Հռոմի պապի պատվին կազմակերպված ընդունելությանը։
Թարգմանությունը՝ Էմմա Չոբանյանի
