Հռոմի պապը Թուրքիա ուղևորության ժամանակ Ստամբուլի հայկական եկեղեցի կայցելի

Հռոմի պապ Լևոն XIV-ը Իտալիայից դուրս առաջին առաքելական ուղևորության շրջանակում նոյեմբերի 27-ից դեկտեմբերի 2-ը կայցելի Թուրքիա և Լիբանան՝ Նիկեայի Առաջին ժողովի 1700-ամյակի առթիվ։ Այս մասին հայտնում է Վատիկանը։

Ըստ այցի օրակարգի՝ ուղևորությունը կսկսվի Թուրքիայից նոյեմբերի 27-ին։ Մայրաքաղաք Անկարա ժամանելուց հետո Հռոմի պապը կհանդիպի երկրի նախագահ Ռեջեփ Թայիփ Էրդողանի հետ, ապա ելույթ կունենա թուրքական կառավարության, քաղաքացիական հասարակության և դիվանագիտական ​​կորպուսի ներկայացուցիչների առջև: Օրվա ավարտին Հռոմի պապը կմեկնի Ստամբուլ:

Նոյեմբերի 28-ին Լևոն XIV-ը Ստամբուլի Սուրբ Հոգու տաճարում կհանդիպի եպիսկոպոսների, քահանաների, սարկավագների, օծված անձանց և հովվական աշխատողների հետ։

Նիկեա (ներկայում՝ Իզնիկ) կարճատև թռիչքից հետո նա կմասնակցի Սուրբ Նեոֆիտոսի հին տաճարի հնագիտական ​​պեղումների մոտ կայանալիք էկումենիկ աղոթքի արարողությանը։ Նույն օրը Ստամբուլ վերադառնալով՝ Հռոմի պապը կհանդիպի առաքելական պատվիրակության կազմում գտնվող եպիսկոպոսների հետ։

Նոյեմբերի 29-ին Հռոմի պապը կայցելի Ստամբուլի Սուլթան Ահմեդի մզկիթ (հայտնի է որպես Կապույտ մզկիթ), որից հետո Մոր Եփրեմ սիրիական ուղղափառ եկեղեցում կհանդիպի տեղի եկեղեցիների և քրիստոնեական համայնքների առաջնորդների հետ։ Կեսօրին նա Սուրբ Գևորգ պատրիարքական եկեղեցում, որը Կոստանդնուպոլսի Տիեզերական պատրիարքության նստավայրն է, կմասնակցի մատուցվող արարողությանը։ Պատարագից հետո Հռոմի պապ Լևոն XIV-ը կհանդիպի Տիեզերական պատրիարք Բարդուղիմեոս I-ի հետ, որից հետո երկու առաջնորդները Պատրիարքական պալատում կստորագրեն համատեղ հռչակագիր։

Հռոմի պապի նոյեմբերի 30-ի ծրագիրը կսկսվի Հայ Առաքելական եկեղեցու Ստամբուլի Մայր տաճարում աղոթքով։

Հաղորդվում է, որ Ստամբուլի  օդանավակայանում հրաժեշտի արարողությունից հետո Հռոմի պապ Լևոն XIV-ը կսկսի իր  ճանապարհորդության երկրորդ փուլը՝ այցելելով Լիբանան։

Թարգմանությունը՝ Էմմա Չոբանյանի