Քաղաքականություն
27.11.2025 | 13:46
Հավաքական անվտանգության պայմանագրի կազմակերպության (ՀԱՊԿ) քարտուղարությունը տեղեկացնում է Հայաստանին կայացվող որոշումների մասին, և Երևանը չի խոչընդոտում դրանց ընդունմանը։ Այս մասին հայտարարել է ՀԱՊԿ գլխավոր քարտուղար Իմանգալի Տասմագամբետովը, գրում է ՏԱՍՍ-ը։
«Հայաստանը սառեցրել է իր մասնակցությունը կազմակերպությանը։ Մենք քարտուղարության մակարդակով նրան տեղեկացնում ենք քննարկվող և ընդունվող բոլոր նյութերի ու փաստաթղթերի մասին։ Նրանք չեն մասնակցում քննարկումներին, բայց չեն խոչընդոտում այդ փաստաթղթերի ընդունմանը սահմանափակ ձևաչափով, ինչպես այսօր տեղի ունեցավ Հավաքական անվտանգության խորհրդում. այս բոլոր փաստաթղթերն ուղարկվել են Հայաստան, նրանք տեղեկացվել են, և մենք նրանցից ստացել ենք փաստաթուղթ, որում նշվում է, որ նրանք դեմ չեն այդ փաստաթղթերի ընդունմանը սահմանափակ ձևաչափով։ Հուսով ենք, որ որոշակի ժամանակ անց Հայաստանի քաղաքական ղեկավարությունը կկայացնի հավասարակշռված որոշում, և մենք միասին կշարժվենք առաջ»,- հայտարարել է նա ՀԱՊԿ Հավաքական անվտանգության խորհրդի նիստից հետո տեղի ունեցած մամուլի ասուլիսում։
Տասմագամբետովի՝ խոսքով՝ «Հայաստանի հարցը պարբերաբար բարձրացվում է ոչ միայն Հավաքական անվտանգության խորհրդի նիստերում և մամուլի ասուլիսներում. այն օրակարգից չի հանվում լրագրողների հետ գործնականում յուրաքանչյուր հանդիպման ժամանակ»։
ՀԱՊԿ գլխավոր քարտուղարն ասել է, որ «Հայաստանն անկախ, ինքնիշխան պետություն է և իրավունք ունի մտնել կամ կասեցնել իր գործունեությունը այս կամ այն կազմակերպությունում»։
Հիշեցնենք, որ Հայաստանն այսօր Ղրղզստանում ընթացող ՀԱՊԿ գագաթնաժողովին չի մասնակցում։
Թարգմանությունը՝ Էմմա Չոբանյանի
