28.04.2026 | 14:43
Կա՞ հեղուկ գազի գնի բարձրացման ռիսկ․ պատասխանում է Էկոնոմիկայի նախարարությունը
Հոնկոնգում խոշոր հրդեհի զոհերի թիվը հասել է 44-ի․ հարյուրավոր մարդիկ դեռևս անհետ կորած են
Քաղաքականություն
27.11.2025 | 12:45
Հրշեջները երկրորդ օրն է՝ պայքարում են Հոնկոնգի բնակելի համալիրում ամենամահացու հրդեհներից մեկի դեմ, որն առնվազն 44 մարդու կյանք է խլել։ Փրկարարական աշխատանքները շարունակվում են։ Շինարարական ընկերության երեք աշխատակից ձերբակալվել է, գրում է France 24-ը։
Թայ Պո շրջանում գտնվող Վան Ֆուկ Քորթ համալիրում չորեքշաբթի կեսօրին բռնկված հրդեհը տարածվել էր համալիրի ութ շենքերից յոթում։ Պաշտոնյաները հայտնել են 44 զոհի մասին, որոնց թվում է մեկ հրշեջ։ Վիրավորվել է առնվազն 62 մարդ, որոնցից շատերն այրվածքներ և շնչառության հետ կապված վնասվածքներ են ստացել։
Երեք անձ՝ շինարարական ընկերության տնօրենները և ինժեներական խորհրդատուն, ձերբակալվել են չկանխամտածված սպանության կասկածանքով։
«Մենք հիմքեր ունենք կարծելու, որ շինարարական ընկերության պատասխանատուն կոպիտ անփութություն է ցուցաբերել»,- ասել է ոստիկանության ավագ վերահսկիչ Այլին Չունգը։
Իշխանությունները կասկածում են, որ բարձրահարկ շենքերի արտաքին պատերի որոշ նյութեր չեն համապատասխանում հրակայունության չափանիշներին, ինչը նպաստել է հրդեհի անսովոր արագ տարածումը։ Հրդեհը սկսվել է 32 հարկանի աշտարակի արտաքին հատվածից, ապա տարածվել է բամբուկե կառուցվածքի և շինարարական ցանցի վրա՝ դեպի շենքի ներս, ապա՝ մյուս շենքեր։
Շուրջ 900 մարդ գիշերը տարհանվել է ժամանակավոր կացարաններ։ Հոնկոնգի ղեկավար Ջոն Լին հայտնել է, որ կեսգիշերի դրությամբ՝ անհետ կորած է համարվում 279 մարդ։ Փրկարարական աշխատանքները շարունակվում են:
Չինաստանի առաջնորդ Սի Ցզինպինը ցավակցություն է հայտնել զոհված հրշեջին և ցավակցություն հայտնել զոհերի ընտանիքներին։ Նա նաև կոչ է արել ջանքեր գործադրել զոհերի և կորուստների թիվը նվազագույնի հասցնելու համար։
Այս հրդեհը Հոնկոնգում տասնամյակների ընթացքում ամենամահացուներից մեկն է։ 1996 թվականի նոյեմբերին Կոուլունի առևտրային շենքում շուրջ 20 ժամ տևած հրդեհի հետևանքով 41 մարդ էր զոհվել։
Թարգմանությունը՝ Էմմա Չոբանյանի
