30.10.2026 | 23:30
Հայաստանի մի շարք հասցեներում էլեկտրաէներգիայի անջատումներ կլինեն
Թուրքիան 6,5 միլիարդ դոլարի պայմանագրեր է կնքել իր «Պողպատե գմբեթ» ՀՕՊ համակարգը հզորացնելու համար
Քաղաքականություն
26.11.2025 | 20:35
Թուրքական պաշտպանական ընկերությունները 6,5 միլիարդ դոլարի պայմանագրեր են կնքել Թուրքիայի ինտեգրված, բազմաշերտ «Պողպատե գմբեթ» հակաօդային պաշտպանության համակարգի ամրապնդման և զարգացման համար։ Այս մասին հայտարարել է Պաշտպանական արդյունաբերության նախագահությունը (SSB), փոխանցում է Sabah-ը։
SSB-ի նախագահ Հալուք Գյորգյունը նշել է, որ պայմանագրերը ներառում են մարտական համակարգեր և դրանց առաջադեմ տարբերակները, որոնք կմշակվեն Roketsan-ի կողմից, հավելելով, որ «Պողպատե գմբեթը» կպատրաստվի ամբողջությամբ տեղական արտադրության համակարգերից։
«Roketsan և Aselsan ընկերությունների կողմից նախկինում արտադրված, մշակված և զինանոցում ներառված հակաօդային պաշտպանության, կարճ և հեռահարության հակաօդային պաշտպանության համակարգերից բացի՝ այսօր մենք նաև պայմանագրեր ենք ստորագրել Roketsan-ի կողմից նախկինում զինանոցում ներառված հարձակողական համակարգերի և դրանց առաջադեմ տարբերակների վերաբերյալ»,- ասել է Գյորգյունը։
Անցյալ տարվա օգոստոսին հայտարարված «Պողպատե գմբեթը» նպատակ ունի ինտեգրված պաշտպանություն ապահովել ցածր, միջին և բարձր բարձրության սպառնալիքներից՝ ցամաքային և ծովային հակաօդային պաշտպանության հարթակների և երկրում մշակված սենսորների միջոցով։
Այս օգոստոսին մատակարարվել են 460 միլիոն դոլարի մի շարք բաղադրիչներ, այդ թվում՝ Hisar O 100 և Siper հակաօդային պաշտպանության, Alp 300-G և 100-G ռադարային, Puhu և Redet ռադիոէլեկտրոնային պատերազմի համակարգեր և Korkut կարճ հեռահարության հակաօդային պաշտպանության մեքենաներ։
Հունիսին Թուրքիայի նախագահ Ռեջեփ Թայիփ Էրդողանը հայտարարել էր, որ Անկարան կբարձրացնի իր սեփական պաշտպանությունն այնպիսի մակարդակի, որ «ոչ ոք նույնիսկ չի մտածի» հարձակվելու մասին։
Պաշտպանական հարթակների, մասնավորապես, մարտական անօդաչու թռչող սարքերի աննախադեպ պահանջարկը նպաստել է Թուրքիայի պաշտպանական արտահանման վերելքին՝ 2024 թվականին հասնելով 7,15 միլիարդ դոլարի՝ 2023 թվականի շուրջ 5,5 միլիարդ դոլարի և 2022-ի 4,4 միլիարդ դոլարի համեմատ։ Պաշտոնյաների խոսքով՝ այս տարի այդ թիվը հեշտությամբ կգերազանցի 8 միլիարդ դոլարը։
Թարգմանությունը՝ Էմմա Չոբանյանի
