19.05.2026 | 18:51
Բելառուսը մտադիր է մասնակցել Արցախի տարածքներում նախագծերին
28 կետից բաղկացած Ուկրաինայի խաղաղության ամերիկյան ծրագիրը կազմվել է ՌԴ-ից ստացված փաստաթղթի հիման վրա. Reuters
Քաղաքականություն
26.11.2025 | 15:09
ԱՄՆ-ի կողմից աջակցվող Ուկրաինայում պատերազմը դադարեցնելու 28 կետից բաղկացած խաղաղության ծրագիրը հիմնված է ռուս հեղինակների կողմից գրված և հոկտեմբերին Թրամփի վարչակազմի ստացած հուշագրի վրա։ Այս մասին Reuters-ին հայտնել են թեմային ծանոթ երեք աղբյուրներ։
Պաշտոնական կարգավիճակ չունեցող այս փաստաթուղթը պարունակում էր դրույթներ, որոնք Կրեմլը նախկինում առաջ էր քաշել բանակցությունների սեղանին, այդ թվում՝ Ուկրաինայի կողմից տարածքային զիջումներ։
Reuters-ի փոխանցմամբ՝ այս հուշագիրը քննարկվել է ԱՄՆ պետքարտուղար Մարկո Ռուբիոյի և Ռուսաստանի արտաքին գործերի նախարար Սերգեյ Լավրովի միջև հեռախոսազրույցի ժամանակ։
Դրանից հետո ռուսների կողմից գրված փաստաթուղթը 28 կետից բաղկացած պլանի հիմք է հանդիսացել, որը, ըստ լրատվամիջոցի, հիմնականում մշակվել է Թրամփի հատուկ ներկայացուցիչներ Սթիվ Ուիթկոֆի և Ջարեդ Քուշների, ինչպես նաև ռուս բանակցող Կիրիլ Դմիտրիևի հանդիպման ժամանակ: Հարցին ծանոթ երկու աղբյուրներ հայտնել են, որ ԱՄՆ Պետքարտուղարությունում և Սպիտակ տանը քիչ մարդիկ են տեղեկացված եղել հանդիպման մասին։
Այնուամենայնիվ, լրատվական գործակալությունը նշում է, որ անցյալ շաբաթավերջին Ժնևում ուկրաինական ու եվրոպական պատվիրակությունների հետ բանակցություններից հետո այս պլանը զգալիորեն փոփոխվել է։
Հավելենք, որ ավելի վաղ Bloomberg-ը խաղաղության բանակցությունների հետ կապված Ուիթկոֆի, Ուշակովի և Դմիտրիևի ենթադրյալ հեռախոսազրույցների սկանդալային գաղտնալսումներն էր հրապարակել։
Թարգմանությունը՝ Էմմա Չոբանյանի
