«Փաշինյանը վամպիրի պես սնվում է նախկին նախագահների շրջանի խնդիրներից․ թող գա հետս բանավիճի»․ Արման Թաթոյան

Այսօր Հայաստանի ներքաղաքական կյանքը վերածված է մրցավազքի։ Այս մասին հրավիրված ասուլիսի ժամանակ հայտարարել է «Միասնության թևեր» քաղաքական նախաձեռնության ղեկավար Արման Թաթոյանը։

«Մի խումբ մարդիկ մեր խնդիրների պատճառներն են, և մեկ այլ խումբ մարդիկ անկարողներ են ուղղակի, որոնք եկել են այս առկա խնդիրները, կուտակված խնդիրները իբր թե լուծելու, բայց դրանք ավելի են խորացնում։ Եվ ստացվել է այնպես, որ մեր երկրում առկա է փակ համակարգ, փակ շղթա, քաղաքական համակարգը երկու թևեր ունի։ Ամբողջությամբ մեկը Նիկոլ Փաշինյանն է, մյուսը՝ նախկին նախագահների համակարգը։ Նիկոլ Փաշինյանը պարզապես սնվում է նախկին նախագահներից, և այս երկու համակարգերը իրար ուժեղացնում են։ Նիկոլ Փաշինյանը հենց այդպես էլ եկել է իշխանության, նախկին նախագահների ատելության վրա, նրանց ժամանակ թույլ տրված սխալներից ելնելով ու հիմա էլ երկիրը պահում է ատելության ու թշնամանքի այս փակ շղթայի մեջ։ Եվ այս փակ շղթան նաև այնպես է ստացվել, որ այս երկու համակարգերը՝ նախկին նախագահները և Նիկոլ Փաշինյանը, առանց իրար գոյություն ունենալ պարզապես չեն կարող»,-նշեց Թաթոյանը։

Նրա խոսքով՝ ստեղծված իրավիճակի պատճառով է, որ բնակչության 60-70% չի մասնակցում քաղաքական կարևորագույն  որոշումների կայացմանը։

«Ես հավակնում եմ դառնալ նրանց ձայնը, և ուզում եմ նաև դիմել մեր քաղաքացիներին, որ մենք եկել ենք ասելու՝ դառնալու ենք ձեր ձայնը, և մենք բոլորով միասին կտրելու ենք, ճեղքելու ենք այս համակարգը, որը, իմ համոզմամբ, առնվազն վերջին հինգ տարիները, եթե ոչ ավելի, ուղղակի թունավորում է մեր քաղաքական համակարգը»,-ասաց Թաթոյանը։

Ըստ նրա՝ Վաղարշապատում տեղի ունեցածը ձախողված քաղաքական համակարգի հետևանք է, փաստ է, որ Փաշինյանի ղեկավարությամբ ՔՊ-ն այսօր իշխանություն է ձևավորում Վաղարշապատում։

«Երբ ընտրությունը կամ մրցավազքը Փաշինյանի և նախկին նախագահների միջև է, ապա Փաշինյանը միշտ հաղթելու է։ Եվ ես ուզում եմ հստակ ասել, որ Փաշինյանի իշխանությունն այսօր 3 հենասյուն ունի։ Առաջինը՝ նախկին նախագահները, երկրորդ՝ եկեղեցին, երրորդ՝ ռուսները։ Ռուսներից նրանք ունեն սարսափելի վախ, Փաշինյանը անձամբ չի խոսում ռուսների դեմ, այլ հանձնարարում է, պատգամավորներն են խոսում, տարբեր աջակիցներ են խոսում, բայց արդյունքում ստացվում է նույն բանը»,-ընդգծեց Թաթոյանը։

Նա ևս մեկ անգամ նշեց՝ «Նիկոլ Փաշինյանը վամպիրի պես սնվում է նախկին նախագահների ժամանակահատվածի հարցերից»։

«Փաշինյանը նախկին նախագահներից է ուզում դարձնել իրեն ընդդիմություն, որովհետև ինքը նախկին նախագահներին է չէ՞ կարողանալու գնալ, ասել՝ այ այս ինչը չեք արել, այս ինչը այսպես։ Հլը մի հատ Փաշինյանին ես հրավիրեցի բանավեճի, հիմա էլ պնդում եմ, թող մի հատ գա իմ հետ բանավեճի։ Տեսնեմ՝ ինչպե՞ս է այդ հարցերը տանելու, ինչ հարցից ուզում է, թող խոսի։ Թո՛ղ նախկինից խոսի, թո՛ղ ներկայից խոսի, բայց ես նախընտրելու եմ, իհարկե, երկրի ապագայից խոսել»,-ասուլիսի ընթացքում ասաց Թաթոյանը։

Եվգենյա Համբարձումյան