«Զանգեզուրի միջանցքը ոչ միայն ռազմավարական երազանք է, այլև առևտրային անհրաժեշտություն». Թուրքիայի առևտրի նախարար

Մինչ համաշխարհային առևտուրը բախվում է դժվարին փորձության, Թուրքիայի առևտրի նախարար Օմեր Բոլաթը Analiz Gazetesi-ի հետ հարցազրույցում նշել է, թե ինչպես է երկիրն իր «աշխարհագրական առավելությունը» վերածում «աշխարհատնտեսական տերության»։ Թուրք պաշտոնյան իր խոսքում կրկին, այսպես կոչված, «Զանգեզուրի միջանցքի» թեմային է անդրադարձել։

«Զանգեզուրի միջանցքը, որը կկապի Թուրքիան թյուրքական աշխարհի և Կենտրոնական Ասիայի հետ, ոչ միայն ռազմավարական երազանք է, այլև առևտրային անհրաժեշտություն։ Ներկայում մեր արտահանումը Կենտրոնական Ասիա մոտավորապես 950 կմ է անցնում Սարփի սահմանային դարպասով։ Երբ Զանգեզուրի միջանցքը բացվի, Թուրքիայի և Ադրբեջանի միջև ճանապարհային հեռավորությունը կկրճատվի մինչև 400 կիլոմետրով։ Այս կրճատումը Չինաստան-Եվրոպա գծում տեղափոխման ժամանակը կկրճատի 5-7 օրով և ծախսերը՝ 15-20%-ով»,- նախագծի օգուտներն է ներկայացրել Բոլաթը։

Անդրադառնալով տարածաշրջանում (Իրան և Հայաստան) քաղաքական հավասարակշռություններին՝ նա ընդգծել է, որ նախագիծը «բացառող» չէ, այլ «բոլորը շահող» են ամբողջ տարածաշրջանում։

«Չնայած աշխարհաքաղաքական մրցակցությունը վերականգնելը դժվար է, առևտրային ներուժի գրավչությունը բավականաչափ ուժեղ է այս խոչընդոտները հաղթահարելու համար: Երկարաժամկետ հեռանկարում Զանգեզուրը կվերածվի տարածաշրջանային վստահություն կերտող խաղաղության նախագծի»,- հայտարարել է նա։

Բոլաթը նշել է, թե «Զարգացման ճանապարհը և Զանգեզուրի միջանցքը նախատեսված են որպես ռազմավարական էներգետիկ և հաղորդակցության միջանցքներ՝ բազմամոդալ տրանսպորտից այն կողմ»։ Նա ընդգծել է, որ նավթի և բնական գազի խողովակաշարերը, օպտիկամանրաթելային ենթակառուցվածքներն ու էլեկտրաէներգիայի փոխանցման գծերը նույնպես ինտեգրված են այս նախագծերում, և որ Թուրքիան առաջ է շարժվում դեպի իր նպատակը՝ դառնալ ոչ միայն լոգիստիկ, այլև արտադրական և էներգետիկ կենտրոն:

Թարգմանությունը՝ Էմմա Չոբանյանի