ՌԴ-ում ազգայնացրել են ձերբակալված ադրբեջանցի գործարարի ակտիվները

ՌԴ Կրասնոդարի երկրամասի արբիտրաժային դատարանն ադրբեջանցի Շախլար Նովրուզովի ակտիվներն ազգայնացրել է՝ դրանք վերածելով պետական եկամտի, հաղորդում է «Կոմերսանտ»-ը։

Ազգայնացված ակտիվների մեջ են մտնում «Տուապսեի ծովային առևտրային նավահանգիստ» (ТМКП)) ՍՊԸ-ի կանոնադրական կապիտալի 100%-ը, «TMCP Enterprise» ընկերությունը, «Տեմրյուկի ծովային փոխադրման տերմինալը» և «Դար Ֆրութ»-ին պատկանող օբյեկտները։

Քննության տվյալներով՝ 1994 թվականից ի վեր անօրինական գործարքների միջոցով Տուապսեի նավահանգստի տարածքում գտնվող նավամատույցը և մի քանի շենքեր անցել են Նովրուզովի, ինչպես նաև մյուս պատասխանողների՝ «Ինժտրանսստրոյ» կորպորացիայի կառավարիչ Օլեգ Բասինի և Բրիտանական Վիրջինյան կղզիներում գրանցված «Vonixel Limited» ընկերության վերահսկողությանը։

Տուապսեի ծովային առևտրային նավահանգիստը (ՏԾՆՆ) և ՏԾՆՆ ձեռնարկությունը մշակում են ներմուծված բեռներ։ Դրանք հիմնականում Թուրքիայից մրգային և բանջարեղենային արտադրանք են։

Շախլար Նովրուզովը Կրասնոդարի «Старый Баку» ռեստորանի, ТМКП ձեռնարկությունների, «Դար Ֆրուտի» և «Подгорный» գյուղատնտեսական կոոպերատիվի սեփականատերն է։ Նա նաև «Կուբանպրոդուկտ» ՍՊԸ-ի նախկին գլխավոր տնօրենն է (ընկերությունն այժմ պատկանում է նրա եղբորը՝ Ռամին Նովրուզովին)։ 2024 թվականին նրա բոլոր ընկերությունների համախառն եկամուտը կազմել է շուրջ 279 միլիոն ռուբլի։

Նովրուզովը ձերբակալվել է այս տարվա սեպտեմբերի սկզբին՝ խոշոր չափի խարդախության մեղադրանքով և ուղարկվել քննչական մեկուսարան։

Թարգմանությունը՝ Էմմա Չոբանյանի