30.10.2026 | 23:30
Հայաստանի մի շարք հասցեներում էլեկտրաէներգիայի անջատումներ կլինեն
Ղազախստանից հայտնել են՝ երբ կավարտվի ադրբեջանական AZAL-ի օդանավի վթարի հետաքննությունը
Քաղաքականություն
25.11.2025 | 16:40
Ղազախստանի կառավարությունը մինչև 2025 թվականի վերջը տեղեկություն կտրամադրի Ակտաու քաղաքի մերձակայքում «Ադրբեջանական ավիաուղիներ» (AZAL) ավիաընկերության օդանավի վթարի հետաքննության վերաբերյալ։ Այս մասին ճեպազրույցի ժամանակ հայտարարել է Ղազախստանի տրանսպորտի փոխնախարար Մաքսատ Կալիակպարովը, գրում են ադրբեջանական լրատվամիջոցները։
Ըստ ղազախ պաշտոնյայի՝ հետաքննությունը շարունակվում է, և երեք ամսից համապատասխան հանձնաժողովին ներկայացված նախնական եզրակացություններից հետո կիրականացվի ավելի խորը տեխնիկական փորձաքննություն։ Կալիակպարովը նշել է, որ աշխատանքը բարդ է և ներառում է մի շարք համապարփակ ուսումնասիրություններ։ Նա ընդգծել է, որ հետաքննության ավարտից հետո զեկույցը, ինչպես նախորդը, ամբողջությամբ կտրամադրվի լրատվամիջոցներին։
Փոխնախարարը հետաքննությունն անվանել է չափազանց լուրջ՝ հավելելով, որ թարմացված տեղեկատվություն նախատեսվում է տրամադրել մինչև այս տարվա վերջ։
«Մենք այս պահին չենք կարող ճշգրիտ ժամանակացույց նշել։ Սա բավականին լուրջ հարց է, ուստի չեմ կարող ամսաթիվ երաշխավորել։ Բայց մենք տարեվերջին մամուլի հաղորդագրություն կներկայացնենք»,- ասել է նա։
Հիշեցնենք, որ 2024 թվականի դեկտեմբերի 25-ին Ղազախստանի Ակտաու քաղաքի մոտակայքում վթարի էր ենթարկվել «Ադրբեջանական ավիաուղիների» J2-8243 չվերթի Embraer 190AR ուղևորատար օդանավը։ Դրանում եղել է 67 մարդ՝ 62 ուղևոր և անձնակազմի 5 անդամ։ Վթարի հետևանքով զոհվել է 38 մարդ, 29-ը՝ ողջ մնացել։ Աղետի պատճառը, ըստ ադրբեջանական կողմի, ռուսական հակաօդային հրթիռային հարվածն է եղել։
Թարգմանությունը՝ Էմմա Չոբանյանի
