22.04.2026 | 23:30
ՀՀ տարածքում ավտոճանապարհները հիմնականում անցանելի են
Ծառայությունը կրճատելու նախագիծը ԱԺ հանձնաժողովի դրական եզրակացությունը ստացավ
24.11.2025 | 13:10
ԱԺ պաշտպանության և անվտանգության հարցերի մշտական հանձնաժողովը միաձայն կողմ քվեարկեց պարտադիր զինվորական ծառայությունը կրճատելու Կառավարության նախագծին։ Այն հանձնաժողովի նիստում ներկայացնում էր ՀՀ պաշտպանության նախարար Սուրեն Պապիկյանը։
«Զինվորական ծառայության և զինծառայողի կարգավիճակի մասին» օրենքում փոփոխություն կատարելու մասին օրենքի նախագծի համաձայն նախատեսվում է շարքային կազմի պարտադիր զինվորական ծառայության 24-ամսյա ժամկետը փոխարինել 18-ամսյա ծառայության ժամկետով։ Ըստ նախագծի՝ դրա գործողությունը տարածվելու է 2026 թվականի հունվարի 1-ից հետո պարտադիր զինվորական ծառայության զորակոչվող քաղաքացիների վրա։
«2025 թվականի ձմեռային զորակոչի շրջանակներում զինված ուժերի համալրում սկսվելու է 2026 թվականի հունվարի 7-ից, որի արդյունքում 18-ամսյա ժամկետով ծառայություն են իրականացնելու 2025 թվականի ձմեռային զորակոչից սկսված պարտադիր զինվորական ծառայության զորակոչված քաղաքացիները։ Ծառայության ժամկետի կրճատումը չի տարածվելու 2026 հունվարի 1-ի դրությամբ պարտադիր զինվորական ծառայության մեջ գտնվող զինծառայողների վրա»,- ասաց Պապիկյանը։
ՊՆ նախարարի խոսքով՝ օրինագծի ընդունումը անհետաձգելի է։
Հանձնաժողովի նախագահ Անդրանիկ Քոչարյանն էլ նշեց, որ դրական եզրակացություն ստանալու պարագայում Կառավարության նախաձեռնությունը հրատապ ռեժիմով կընդգրկվի ԱԺ լիագումար նիստերի օրակարգում։
Անի Թամրազյան
