Աշխատում ենք փաստաթղթի վրա․ հայտնի է՝ ինչ են քննարկել Զելենսկին ու եվրոպացի առաջնորդները

Գերմանիայի կանցլեր Ֆրիդրիխ Մերցը, Մեծ Բրիտանիայի վարչապետ Քիր Սթարմերը և Ֆրանսիայի նախագահ Էմանուել Մակրոնը համաձայնել են, որ ցանկացած համաձայնագրի մեկնարկային կետը պետք է լինի առաջնագիծը։ Այս մասին նրանք պայմանավորվել են Ուկրաինայի նախագահ Վլադիմիր Զելենսկիի հետ հեռախոսազրույցի ժամանակ, գրում է BBC-ի ռուսական ծառայությունը։

Մերցի վարչակազմի մամուլի հաղորդագրության համաձայն՝ եվրոպացի առաջնորդները վերահաստատել են իրենց աջակցությունն Ուկրաինային՝ շտապ և արդար խաղաղության ճանապարհին։ Նրանք ողջունել են պատերազմը դադարեցնելու՝ ԱՄՆ-ի ջանքերը, այդ թվում՝ «Ուկրաինայի ինքնիշխանությանը նվիրվածությունն» ու Կիևին անվտանգության երաշխիքներ տրամադրելու պատրաստակամությունը։

Չորս երկրների առաջնորդները համաձայնել են շարունակել պաշտպանել եվրոպական և ուկրաինական շահերը երկարաժամկետ հեռանկարում։

«Սա, ի թիվս այլ բաների, ներառում է այն, որ շփման գիծը լինի ցանկացած համաձայնագրի մեկնարկային կետը, և որ Ուկրաինայի զինված ուժերը պահպանեն Ուկրաինայի ինքնիշխանությունն արդյունավետորեն պաշտպանելու կարողությունը»,- նշվում է մամուլի հաղորդագրության մեջ։

Նշվում է, որ եվրոպական երկրներին վերաբերող ցանկացած համաձայնագիր պահանջում է եվրոպացի գործընկերների հաստատումը։

Եվրոպացի առաջնորդները պաշտոնապես չեն ստացել պատերազմը դադարեցնելու՝ ԱՄՆ-ի մշակած ծրագիրը։ Լրատվամիջոցների կողմից հրապարակված փաստաթղթի տեքստի համաձայն՝ ծրագրի 28 կետերից մի քանիսն անմիջականորեն ազդում են Եվրոպայի վրա։

«Մենք քննարկել ենք Ուկրաինայի և ամբողջ Եվրոպայի համար խաղաղության ծրագիրը։ Մենք գնահատում ենք Միացյալ Նահանգների, նախագահ Թրամփի և նրա թիմի ջանքերը՝ այս պատերազմը դադարեցնելու համար։ Մենք աշխատում ենք ամերիկյան կողմի կողմից պատրաստված փաստաթղթի վրա։ Սա պետք է լինի այնպիսի ծրագիր, որը կապահովի իրական և արժանապատիվ խաղաղություն»,- իր հերթին նշել է Ուկրաինայի նախագահ Վլադիմիր Զելենսկին։

Նա հավելել է, որ եվրոպացի առաջնորդների հետ սերտորեն համակարգում են իրենց ջանքերը՝ կողմերի հիմնարար դիրքորոշումները հաշվի առնելու համար։

Թարգմանությունը՝ Էմմա Չոբանյանի