Հայ մեծ բարերարը Կիպրոսի քաղաքացի ա, դա էլ ասեք․ Վլադիմիր Վարդանյանը՝ ընդդիմությանը․ ՏԵՍԱՆՅՈՒԹ

ԱԺ պետաիրավական հանձնաժողովում քննարկվում է «Հայաստան» խմբակցության հայտարարությունը «Հանրապետությունում առկա քաղբանտարկյալների և նրանց խախտված իրավունքների վերականգնման մասին», որով հիմնական զեկուցող է պատգամավոր Էլինար Վարդանյանը։

Հանձնաժողովի նախագահ Վլադիմիր Վարդանյանը, դիմելով ընդդիմությանը, նշեց, որ հայտարարությունը փաստահեն չէ։

«Ես պարզապես ձեր հայտարարության տեքստը գցել եմ արհեստական բանականության համապատասխան գործիքին՝ ChatGPT-ին և ստացել եմ պատասխաններ։ Կարո՞ղ եմ ընթերցել, եթե ցանկանում եք։ Իսկ եթե ընթերցեմ, կստացվի հետևյալը, որ առկա են դատողություններ, դրանք հիմնավորված չեն փաստերով, չկա որևիցե զեկույց, թե՛ միջազգային կազմակերպությունների, թե՛ միջազգային կառույցների վերաբերյալ, չկան փաստեր, չկան թվեր, չկա վերաբերմունք»,-նշեց Վարդանյանը։

Նրա խոսքով՝ ընդդիմությունը մի փաստաթուղթ է բերել քաջ գիտակցելով, որ այդ փաստաթղթում առկա դիրքորոշումները և մոտեցումները որևիցե անաչառ կառույցի կողմից չեն հաստատվում։

«Ուզում եմ անդրադառնալ «Մարտի 1»-ից հետո Հյուսիսային պողոտայում տեղի ունեցող գործընթացներին։ Այն, որ մեկը եկավ, համալսարանի դասախոսներից ընդդիմադիր գործընկերներից մեկի ձեռքը սեղմեց և մարդուն անմիջապես ձերբակալեցին, բերման ենթարկեցին։ Ո՞ր օրենքով, ինչի՞ հիման վրա, բա ինչի՞ չէիք խոսում քաղաքական բռնաճնշումներից։ Չեմ գնում անցյալ, անցյալն անցյալ է։ Չեմ կարող գնալ դեպի ապագա, ապագան մենք ձեզ հետ համատեղ ենք կառուցելու, և ես վստահ եմ՝ դուք ևս կկրկնեք իմ պնդումը, որ Հայաստանի Հանրապետությունում ապագա կա։ Բայց ներկան մենք ձեզ հետ պետք է օբյեկտիվ վերլուծենք և գնանք առաջ»,-նշեց նա։

Խմբակցությունը հայտարարության նախագծում գրել էր նաև, որ հետապնդման են ենթարկվում «հասարակական և բարեգործական գործունեություն իրականացնող անձինք»․ «Մի հատ էլ կողքը գրեիք, որ Կիպրոսի քաղաքացի է։ Հայ, մեծ բարերար, Կիպրոսի քաղաքացի։ Մի՛ արեք այդ էլի, մի փորձեք ներկայացնել այն, ինչ-որ չկա»։

Մանրամասները՝ տեսանյութում։