Հայաստանն ու Ղազախստանը ռազմավարական գործընկերության վերաբերյալ պատմական փաստաթուղթ կստորագրեն․ Տոկաև. ՏԵՍԱՆՅՈՒԹ

Ղազախստանն ու Հայաստանն այսօր միջպետական ​​հարաբերությունները նոր մակարդակի բարձրացնող ռազմավարական գործընկերության փաստաթուղթ կստորագրեն։ Այս մասին հայտարարել է Ղազախստանի ղեկավար Կասիմ-Ժոմարտ Տոկաևը Աստանայում Հայաստանի վարչապետ Նիկոլ Փաշինյանի հետ բանակցությունների ժամանակ, հաղորդում է «Կազինֆորմ»-ը։

Նա նշել է, որ Նիկոլ Փաշինյանի այցը Ղազախստան մեծ նշանակություն ունի երկու երկրների համար։

«Հայաստանը Ղազախստանի հիմնական քաղաքական, առևտրային և տնտեսական գործընկերներից մեկն է Հարավային Կովկասում։ Ղազախ ժողովուրդը բարձր է գնահատում հայ ժողովրդին, նրա հինավուրց պատմությունը, հարուստ մշակույթը և ավանդույթները։ Ձեր երկիրը դարձել է ղազախների շրջանում ամենատարածված զբոսաշրջային վայրերից մեկը։ Այս տարի անցկացվել են նշանակալի միջոցառումներ, որոնք նպաստել են մեր երկրների մերձեցմանը։ Հայաստանում առաջին անգամ անցկացվել են ղազախական մշակույթի օրեր, իսկ Երևանում բացվել է այգի՝ ի պատիվ մեծ ղազախ բանաստեղծ և մանկավարժ Աբայի Կունանբայուլիի»,- ասել է Կասիմ-Ժոմարտ Տոկաևը։

Նա շնորհակալություն է հայտնել ՀՀ վարչապետին այս կարևոր նախաձեռնություններին աջակցելու համար։

«Մենք սա համարում ենք ղազախ ժողովրդի նկատմամբ ուշադրության հատուկ դրսևորում։ Այս նախաձեռնությունները Ղազախստանի և Հայաստանի միջև անսասան բարեկամության և փոխադարձ հարգանքի հստակ ապացույցն են։ Երկու երկրների միջև հաստատվել է բաց և վստահելի քաղաքական երկխոսություն բոլոր մակարդակներում։ Ստեղծվել են սերտ և արդյունավետ կապեր տարածաշրջանային և միջազգային կառույցներում։ Մեր համագործակցությունը առևտրային, տնտեսական, մշակութային, հումանիտար, գիտական ​​և կրթական ոլորտներում կայուն զարգանում է։ Մենք մեծ հնարավորություններ ունենք մեր համագործակցության հետագա զարգացման համար։ Այսօր մենք կստորագրենք պատմական փաստաթուղթ, որը մեր երկրների հարաբերությունները կբարձրացնի ռազմավարական մակարդակի»,- ընդգծել է Ղազախստանի նախագահը։

Թարգմանությունը՝ Էմմա Չոբանյանի