Թուրքիայի առաջին անօդաչու մարտական ​​ինքնաթիռը՝ Bayraktar KIZILELMA-ն, պատմական փորձարկում է անցկացրել F-16-ների հետ

Թուրքիայի առաջին անօդաչու մարտական ​​ինքնաթիռը՝ Bayraktar KIZILELMA-ն, պատմական փորձարկում է անցկացրել օդում երկու F-16 կործանիչների մասնակցությամբ՝ խոցելով պայմանական թիրախը GÖKDOĞAN օդ-օդ դասի հրթիռի իմիտացիոն արձակման ժամանակ։ Թուրքական Բայքար ընկերության հաղորդմամբ՝ Bayraktar KIZILELMA անօդաչու թռչող սարքը հաջողությամբ անցել է ևս մեկ կարևոր փորձարկում, որը կապացուցի դրա արդյունավետությունը մարտադաշտում, գրում է Անադոլու գործակալությունը։

Թուրքական արտադրության անօդաչու մարտական ​​ինքնաթիռը մեկ ժամ 45 րոպե տևողությամբ թռիչք է իրականացրել 15,000 ոտնաչափ միջին բարձրության վրա՝ կատարելով մոտ թռիչքներ F-16 կործանիչների հետ և փորձարկելով հայրենական ռադարի և զինամթերքի ինտեգրումը: Bayraktar KIZILELMA-ն այս փորձարկումների ընթացքում գրանցել է ավելի քան 55 թռիչքային ժամ:

Մեկ F-16 ինքնաթիռը մոտ տարածությունից թռիչք է կատարել KIZILELMA-ի հետ՝ ցուցադրելով անօդաչու ինքնաթիռի համատեղելիությունը անձնակազմով մարտական ​​ինքնաթիռների հետ, իսկ մյուսը ծառայել է որպես թիրախային ինքնաթիռ։ Վիրտուալ հրթիռը հաջողությամբ խոցել է բարձր մանևրային F-16-ը։

Փորձարկվել է նաև հարթակի աերոդինամիկական և ավիացիոն համատեղելիությունը GÖKDOĞAN հրթիռի հետ։

Բացի այդ, ազգային MURAD AESA ռադարներ են փորձարկվել հայտնաբերման, հետևման, թիրախի որոնման և տվյալների փոխանցման համար դժվարին պայմաններում։

Թարգմանությունը՝ Էմմա Չոբանյանի