Կառավարությունը դատավորներին զենք եւ փամփուշտներ կտրամադրի. նախկինում օրենքը չի գործել

Առաջիկայում դատավորներին կառավարության կողմից զենք կտրամադրվի: Այս մասին Factor.am-ը տեղեկանում է կառավարության նոյեմբերի 1-ի նիստի օրակարգից:

Նախագիծը ներկայացնելու է արդարադատության նախարարությունը, սակայն այն զեկուցվող չէ:

Նախագծով նախատեսվում է, որ ոստիկանությունը մեկ ամսվա ընթացքում պետք է սահմանի դատավորներին տրամադրվող զենքի տեսակները, ձեւը, մոդելը, փամփուշտների քանակը եւ պաշտպանության հատուկ միջոցների տեսակները:  Ոստիկանությունը ստանձնելու է նաեւ դատավորների՝ զենքի հետ անվտանգ վարվելու կանոնների ուսուցումը:

Դատավորը լիազորությունները դադարեցնելու դեպքում մեկ շաբաթվա նթացքում իրեն ամրացված զենքը եւ փամփուշտները հանձնելու է ոստիկանությանը:

Կառավարության օրակարգ ընդունված «Դատավորներին հաշվեցուցակային զենք եւ պաշտպանության հատուկ միջոցներ տրամադրելու կարգը սահմանելու մասին» նախագծում որպես հիմնավորում նշվում է այն, որ «Հայաստանի Հանրապետության դատական օրենսգիրք» սահմանադրական օրենքի 63-րդ հոդվածի 1-ին մասի համաձայն՝ դատավորն ունի հաշվեցուցակային զենք եւ պաշտպանության հատուկ միջոցներ պահելու եւ կրելու իրավունք: Դատավորներին հաշվեցուցակային զենք եւ պաշտպանության հատուկ միջոցներ տրամադրելու կարգը սահմանում է Կառավարությունը:

Վերոհիշյալը վկայում է «Դատավորներին հաշվեցուցակային զենք եւ պաշտպանության հատուկ միջոցներ տրա­մադրելու կարգը սահմանելու մասին» Կառավարության որոշման ընդունման անհրաժեշտության մասին:

Ուշագրավ է, որ այս օրենքը նախկինում չի գործել:

Հայկ Վարդանյան