Այն, ինչն արտահայտում է ժողովրդի լեգիտիմ կամքը, թույլատրելի է․ Փաշինյանը՝ նոր հեղափոխություն անելու մասին․ ՏԵՍԱՆՅՈՒԹ

2025 թվականի հոկտեմբերի 1-ին Ազգային ժողովի հարց ու պատասխանի ժամանակ, դիմելով ընդդիմադիրներին, վարչապետ Նիկոլ Փաշինյանն ասել էր՝ «Եթե ամեն ինչ այդքան վատ է, հեղափոխություն արեք»:

Կառավարության այսօրվա նիստից հետո վարչապետ Նիկոլ Փաշինյանից Factor TV-ն հետաքրքրվեց, թե ի՞նչ մեթոդներով է նա թույլատրելի համարում նոր հեղափոխության իրականացումը։ Մասնավորապես՝ խնդրեցինք հայտնել՝ հեղափոխություն անելու նպատակի իրագործման համար թույլատրելի՞ է արդյոք․

1․ Ազգային ժողովում կամ այլ պետական, հասարակական կառույցներում, փողոցներում, հասարակական վայրերում ծխարձակող միջոցների օգտագործումը։

2․ Փողոցներն անժամկետ փակելը։

3․Ռադիոտուն կամ այլ հատուկ պահպանվող տարածք մուտք գործելը։

4․ 3-րդ կետում նշված կառույցների դուռը կամ որևէ այլ գույք վնասելը՝ խոստումով, որ հետագայում դրանք կվերականգնվեն։

5․ ՀՀ դատարանների մուտքերն ու ելքերը արգելափակելը, այդպիսի կոչով հանդես գալը, որպեսզի դատավորները չկարողանան կատարել իրենց պարտականություննեը, կայացնել ընդդիմադիրների համար անցանկալ կամ նրանց համոզմամբ՝ անարդարացի որոշումներ։

6․ Ազգային ժողովի շենքը շրջափակելը՝ պատգամավորների ազատ ելումուտը խոչընդոտելով։

7․ Ուսումնական հաստատություններում դասադուլներ կազմակերպելը, ուսանողներին, աշակերտներին կոչ անելը դասի չգնալ։

Սրանք, ըստ էության, այն գործողություններն են, որոնք աջակիցների մասնակցությամբ իրականացրել է Փաշինյանը 2018 թվականի հեղափոխության օրերին։

«Ցանկացած բան, որն արտահայտում է ժողովրդի լեգիտիմ կամքը, թույլատրելի է։ Այն, ինչ չի արտահայտում ժողովրդի լեգիտիմ կամքը, անթույլատրելի է»,- ի պատասխան ասաց Նիկոլ Փաշինյանը։

Factor TV-ի լրագրողի հստակեցնող հարցին՝ ռադիոտան դուռը ջարդելը թույլատրելի՞ է, Փաշինյանը կրկին նույն պատասխանը տվեց։ Հարցին՝ ինչպե՞ս է չափվում ժողովրդի լեգիտիմ կամքը, Փաշինյանը պատասխանեց․ «Ժողովրդի լեգիտիմ կամքի արտահայտմամբ։ Ժողովրդի լեգիտիմ կամքն ինչպե՞ս է արտահայտվում, արտահայտվում է 50+1 %-ով»։

Լրագրողի հակադարձմանը՝ այն, ինչ Դուք արել եք 2018-ին, արել եք 50+1 % չունենալով, այլ 7 %-ով, Փաշինյանը պատասխանեց, թե ինքն ընտրություններում ինչ-որ տոկոս ունենա- չունենալու մասին չի խոսում, այլ ժողովրդի լեգիտիմ կամքի մասին։

Մանրամասները՝ տեսանյութում։

Արաքս Մամուլյան
Նարեկ Կիրակոսյան