Հասարակություն
19.11.2025 | 21:43Մեկ ամսից ավելի է՝ ուժի մեջ է օրենքը, որով մեքենաներից հնչող բարձր երաժշտությամբ երթևեկող վարորդները պետք է տուգանվեն։ Իրենց երաժշտական ճաշակը հանրությանը թելադրող վարորդները, սակայն, ոչ միայն շարունակում են երթևեկության մեջ բարձր երաժշտություն լսել, այլև պատասխանատվությունից խուսափելու տարբերակներ փնտրել։
Զրուցել ենք օրենքը շրջանցելու հնարամիտ տարբերակներ առաջարկողներից մեկի հետ, որն իր ծառայությունները գովազդել էր սոցցանցում։ Մեր զրուցակցի խոսքով՝ մեքենան տեսնելուց հետո կարող է ասել, թե որքան կարժենա ուժեղացուցիչի, այսպես ասած, իրավապահներից քողարկումը։ Ֆեյսբուքյան տարբեր խմբերում վարորդները քննարկում են՝ ինչպես խուսափել տուգանքից, միաժամանակ, դժգոհում գործող օրենքից։
«Ճանապարհային երթևեկության անվտանգության ապահովման մասին» օրենքում և Վարչական իրավախախտումների վերաբերյալ ՀՀ օրենսգրքում փոփոխությունները հեղինակել են ՔՊ-ական պատգամավորներ Սերգեյ Բագրատյանը, Ալեն Սիմոնյանը, Հասմիկ Հակոբյանն ու Արուսյակ Ջուլհակյանը։ Ըստ իրավական ակտի՝ խախտումը պետք է արձանագրվի տեխզննման ժամանակ։ Եթե բացի գործարանային սարքերից մեքենայի վրա լինեն նաև լրացուցիչ սարքավորումներ, կառգրավվեն իրավապահների կողմից։
Պարզվում է՝ ֆեյսբուքյան օգտատերերից մեկը ոչ միայն կարողանում է քողարկել մեքենայի լրացուցիչ սարքավորումները, այլև անխոչընդոտ երթևեկել մգեցված ապակիներով, որը ևս օրենքի խախտում է։ «Վարորդի ընկեր» ՀԿ նախագահ Տիգրան Քեյանի կարծիքով՝ մեքենաներում լրացուցիչ սարքավորումների տեղադրման արգելքն ուղղված չէ երթևեկության անվտանգության բարձրացմանը։
Մեքենաներում տեղադրված լրացուցիչ ուժեղացուցիչներ և խլացուցիչներ հայտնաբերելու դեպքում վարորդները տուգանվում են նվազագույն աշխատավարձի տասնապատիկի չափով, իրավապահները նրանց սարքավորումները բռնագրավում են և տուգանային 2 միավոր իջեցնում։ Ստանդարտին չհամապատասխանող լրացուցիչ ուժեղացուցիչներ օգտագործելու համար օրենքի ուժի մեջ մտնելուց մինչև օրս 84 վարորդ է տուգանվել։
Մանրամասները՝ տեսանյութում։
Անի Թամրազյան
