07.09.2026 | 13:33
Պուտինը զանգահարել է Ալիևին․ քննարկվել են առևտրատնտեսական ու հումանիտար հարցեր
«Ֆիզիկական ուժեղ ցավ և հոգեկան տառապանք է պատճառել Տիգրան Մակարյանին»․ Ռազմիկ Մկրտչյանի և ևս 2 ամբաստանյալների գործը դատարանում է
Քաղաքականություն
20.11.2025 | 16:42
Շենգավիթ վարչական շրջանի արդեն նախկին ղեկավար Ռազմիկ Մկրտչյանի, «Քաղաքացիական պայմանագիր» կուսակցության անդամ Տաթևիկ Հակոբյանի և Տիգրան Մկրտչյանի գործը նոյեմբերի 14-ին դատարան է հանձնվել։ Այս մասին Factor TV-ն տեղեկանում է «Դատալեքս» դատական-տեղեկատվական համակարգից։
Մեղադրական եզրակացության մեջ նշվում է, որ Շենգավիթ վարչական շրջանի ղեկավարի պաշտոնը զբաղեցնող Մկրտչյանը, հանդիսանալով «Քաղաքացիական պայմանագիր» կուսակցության անդամ և նույն վարչական շրջանի կուսակցության խորհրդի անդամ, նույն կուսակցության անդամ Տաթևիկ Հակոբյանի օժանդակությամբ և Գոռ Թադևոսյանի, Տիգրան Մկրտչյանի ու ինքնությունները չպարզված այլ անձանց հետ համակատարմամբ ֆիզիկական ուժեղ ցավ և հոգեկան ուժեղ տառապանք է պատճառել «Քաղաքացիական պայմանագիր» կուսակցության Շենգավիթի տարածքային կառույցի խորհրդի նախագահ Տիգրան Մակարյանին՝ կապված նրա քաղաքական և հասարակական գործունեության հետ:
Գործը մակագրվել է դատավոր Տաթևիկ Մուրադյանին։ Դատավորի աշխատակազմին է փոխանցվել նաև իրեղեն ապացույցով 1 փաթեթ։
Նշենք, որ Ռազմիկ Մկրտչյանի նկատմամբ խափանման միջոց է ընտրվել վարչական հսկողությունը, մյուս 2-ի նկատմամբ՝ բացակայելու արգելքը։
Ավելի վաղ Ռազմիկ Մկրտչյանը ֆեյսբուքյան էջում հայտնել էր, որ որոշել է դուրս գալ «Քաղաքացիական պայմանագիր» կուսակցությունից։ Մկրտչյանը, սակայն, չէր նշել, թե որն է որոշման պատճառը։
Ձերբալակվելուց օրեր առաջ, հունիսի 10-ին նա հայտնել էր, որ թողնում է վարչական շրջանի ղեկավարի պաշտոնը՝ պատճառաբանելով, թե որոշումն անձնական խնդիրներով է պայմանավորված: Նա Շենգավիթ վարչական շրջանը ղեկավարում էր 2018 թվականից:
Եվգենյա Համբարձումյան
