Ինչ է կատարվում Գյումրիի ավագանու կուլիսներում․ ավագանու անդամների՝ մանդատից հրաժարումների հետքերով

Գյումրու ընտրատարածքային ընտրական հանձնաժողովն ավագանու մանդատներից հրաժարվելու կամ ընտրական ցուցակը լքելու դիմումներ է ստացել:

Կալանավայրում գտնվելու պատճառով նախ մանդատներից հրաժարվեցին Գյումրիի ավագանու «Կոմունիստական կուսակցություն» խմբակցության անդամներ Գևորգ Ղուկասյանը և Սեդրակ Խաչատրյանը, նրանց փոխարինեցին նույն կուսակցությունից ցուցակի հաջորդ համարները՝ Տիգրան Ավագյանը և Սամսոն Էլբակյանը։ Այս մասին Factor TV-ն տեղեկանում է Կենտրոնական ընտրական հանձնաժողովից։ Նշենք, որ Գևորգ Ղուկասյանը Գյումրիի համայնքապետ Վարդան Ղուկասյանի եղբոր թոռն է։

Սակայն, դեռ մանդատը չվերցրած Տիգրան Ավագյանը ևս կալանավորվեց և կալանավայրից ներկայացրեց մանդատը վայր դնելու մասին դիմում։ Ավագյանի մանդատը պետք է հանձնվի «Կոմունիստական կուսակցության» ընտրացուցակի հաջորդ համարին՝ Արտյոմ Մկրտչյանին, որն այս պահին զբաղեցնում է համայնքապետարանի կոմունալ տնտեսության բաժնի պետի պաշտոնը, սակայն «Տեղական ինքնակառավարման մասին» օրենքը թույլ չի տալիս համատեղել այդ պաշտոնը մանդատի հետ։ Մկրտչյանը մեկ ամիս ունի կողմնորոշվելու համար՝ ուզում է ավագանու անդամ դառնալ, թե մնալ բաժնի պետի պաշտոնում։

Թիվ 31 ընտրատարածքային հանձնաժողովի առաջիկա նիստում կքննարկվեն նաև «Մեր քաղաքը» կուսակցությունների դաշինքի ավագանու անդամ Նարեկ Միրզոյանի և Կոմունիստական կուսակցության ցուցակում ընդգրկված Գնել Մանուկյանի ինքնաբացարկի միջնորդությունները։

Միրզոյանի մանդատը պետք է փոխանցվեր Հասմիկ Խաչատրյանին, սակայն նա ևս ինքնաբացարկի դիմում է ներկայացրել։ Ավագանու անդամի մանդատը փոխանցվելու է Արտակ Հովսեփյանին։

Գյումրիի քաղաքապետի խորհրդական Լիլիթ Աղեկյանը Factor TV-ի հետ զրույցում նշեց, որ գործընթացի շուրջ ավելորդ աղմուկ է տարածվում, ինտրիգ է ստեղծվում։

«Մարդիկ կան, որոնք հրաժարվել են մանդատներից, ցուցակի հերթականությամբ գնում են, փոխարինողներն կլինեն։ Ինչի՞ են ինտրիգ ստեղծում չեղած տեղը, չեմ հասկանում։ ՔՊ-ի սարքած հերթական բաներն են»,- նշեց նա։

Եվգենյա Համբարձումյան