Ֆիդանը հայտնել է՝ երբ Թուրքիան կկարգավորի հարաբերությունները ՀՀ-ի հետ և կբացի սահմանը

Պատրաստ ենք Հայաստանի հետ հարաբերությունների կարգավորմանը։ Այս մասին հայտարարել է Թուրքիայի ԱԳ նախարար Հաքան Ֆիդանը, փոխանցում է թուրքական պետական Անադոլու գործակալությունը։

Նա նշել է, որ Անկարան բազմիցս հայտարարել է Թուրքիա-Հայաստան հարաբերությունների կարգավորման վերաբերյալ իր քաղաքականության մասին։

«Մենք պատրաստ ենք կարգավորել հարաբերությունները Հայաստանի հետ, երբ Ադրբեջանն ու Հայաստանը ստորագրեն վերջնական խաղաղության համաձայնագիրը։ Մենք դա հայտարարել ենք նախապես։ Գլխավոր պատճառը, որ Հայաստանն այդքան ձգտում է տարածաշրջանում խաղաղության, այն է, որ մեզանից տեսնում է հարաբերությունների կարգավորման մտադրության մասին հայտարարություն»,- ասել է Թուրքիայի ԱԳ նախարարը՝ նշելով, որ իրենց համար կարևոր են  Հայաստանի հետ հարաբերությունների կարգավորումը, սահմանի բացումը և տնտեսության վերականգնումը։

Ֆիդանը հայտարարել է, թե Անկարան չի ցանկանում սառեցված հակամարտություն Հարավային Կովկասում։

«Եթե մենք հիմա կարգավորենք հարաբերությունները, մենք կվերացնենք ամենակարևոր պատճառը, որի համար Հայաստանը պետք է Ադրբեջանի հետ խաղաղության համաձայնագիր ստորագրի: Հետևաբար, կա հավանականություն, որ մենք տարածաշրջանում կբախվենք սառեցված պատերազմի: Մենք դա չենք ուզում»,- ասել է թուրք պաշտոնյան։

Նշելով, որ երկու երկրները նախաստորագրել են համաձայնագիրը Վաշինգտոնում, Ֆիդանն ասել է, որ համաձայնագրում չի ներառվել երկու հիմնական բան․ մեկը «Զանգեզուրի միջանցքի հարցն է, երկրորդը՝ Հայաստանի սահմանադրության հետ կապված որոշ հարցեր»։ Նա հավելել է, որ երբ այս հարցերը լուծվեն և Ադրբեջանը ստորագրի վերջնական համաձայնագիրը, Թուրքիան կբացի իր սահմանային դարպասները Հայաստանի հետ։

Թարգմանությունը՝ Էմմա Չոբանյանի