ՌԴ-ն չի մասնակցի չորեքշաբթի Թուրքիայում կայանալիք Ուկրաինայի վերաբերյալ բանակցություններին

Ռուսաստանի ներկայացուցիչները չեն մասնակցի Ուկրաինայի հետ խաղաղության բանակցությունների վերաբերյալ շփումներին, որոնք նախատեսվում է անցկացնել վաղը Թուրքիայում։ Այս մասին հայտարարել է Ռուսաստանի նախագահի մամուլի քարտուղար Դմիտրի Պեսկովը, գրում է Ինտերֆաքսը։

«Վաղը Թուրքիայում Ռուսաստանի ներկայացուցիչներ չեն լինի։ Այս պահին այս շփումները տեղի են ունենում առանց Ռուսաստանի մասնակցության։ Մենք կսպասենք տեղեկատվության այն մասին, թե իրականում ինչ է քննարկվելու Ստամբուլում»,- լրագրողներին ասել է Պեսկովը։

Հարցին՝ արդյո՞ք Մոսկվան Կիևից որևէ տեղեկություն է ստացել բանակցությունների վերաբերյալ, Պեսկովը պատասխանել է. «Մենք դեռևս Կիևից որևէ տեղեկատվություն չենք ստացել: Ըստ երևույթին, Զելենսկին նկատի ուներ վաղը Ստամբուլում կայանալիք շփումները։ Դրանք Զելենսկիի շփումներն են մեր թուրք գործընկերների հետ, որոնց, հավանաբար, կմիանա պարոն  Ուիթկոֆը: Մենք կսպասենք այդ բանակցությունների արդյունքներին»։

Նա նաև հայտարարել է, որ Ռուսաստանի նախագահ Վլադիմիր Պուտինը բաց կլինի Թուրքիայում կայանալիք Ուկրաինայի հարցով բանակցությունների մասնակիցների հետ քննարկումների համար, եթե նրանք անհրաժեշտ համարեն նրան տեղեկացնել արդյունքների մասին, սակայն ներկայում նման ծրագրեր չկան։

«Դեռ նման կոնկրետ ծրագրեր չկան։ Այնուամենայնիվ, եթե ձեր նշած անձանցից որևէ մեկը անհրաժեշտ համարի տեղեկացնել ռուսական կողմին, նախագահ Պուտինը, իհարկե, բաց կլինի քննարկման համար»,- երեքշաբթի լրագրողներին ասել է Պեսկովը։

Ավելի վաղ հաղորդվել էր, որ Ուկրաինայի նախագահ Վլադիմիր Զելենսկին վաղը մեկնելու է Թուրքիա՝ բանակցություններն «ինտենսիվացնելու» և գործընկերներին «մշակված լուծումներ» առաջարկելու, ինչպես նաև գերիների փոխանակումը վերսկսելու համար։ Ըստ լրատվամիջոցների տեղեկությունների՝ ԱՄՆ նախագահի հատուկ ներկայացուցիչ Սթիվ Ուիթկոֆը ևս մասնակցելու է Թուրքիայում կայանալիք հանդիպումներին։

Թարգմանությունը՝ Էմմա Չոբանյանի