31.10.2026 | 12:28
Վահան Բիչախչյանը խաղադաշտ է վերադարձել շուրջ 3 ամսավաընդմիջումից հետո
Ռուսական հարվածի հետևանքով Խարկովում երեխա է զոհվել, Դնեպրում լրատվամիջոցների շենք է վնասվել
Քաղաքականություն
18.11.2025 | 14:16
Գիշերը ռուսական անօդաչու թռչող սարքերը հարձակվել են Դնեպր քաղաքի վրա։ Current time-ի փոխանցմամբ՝ հարվածներից մեկը հասցվել է այն շենքին, որտեղ աշխատում են «Суспільне Дніпро»-ի և «Ուկրաինական ռադիո Դնեպր»-ի լրագրողները։ Խմբագրության գրասենյակում հրդեհ է բռնկվել. այդ պահին ներսում ոչ ոք չի եղել։
Դնեպրոպետրովսկի մարզային ռազմական վարչակազմի ղեկավար Վլադիսլավ Գայվանենկոն հայտնել է, որ գիշերը Դնեպրոպետրովսկում ռուսական զորքերի հարձակման հետևանքով վիրավորվել է երկու մարդ։ Վնասվել են նաև վարչական շենք, մի քանի բնակելի շենքեր, խանութներ և ենթակառուցվածքային օբյեկտներ։
Դնեպրոպետրովսկի մարզի Սամարայի և Պավլոգրադի շրջաններում նույնպես գրանցվել են ենթակառուցվածքների վնասներ։
Ռուսական ուժերը հարվածել են նաև Խարկովի մարզի հինգ բնակավայրի, հայտնել է շրջանային վարչակազմի ղեկավար Օլեգ Սինեգուբովը։ Ըստ նրա՝ Բերեստին քաղաքում 17-ամյա աղջիկ է զոհվել, ևս 11-ը՝ վիրավորվել։ Ավերածությունների թվում են վարչական և բնակելի շենքեր, ինչպես նաև էլեկտրահաղորդման գծեր։
«Ուկրզալիզնիցա»-ն հայտնել է Դնեպրում և Խարկովի մարզում երկաթուղային գծերի վնասման մասին, ինչը ստիպել է մի քանի գնացքների երթևեկությունը դադարեցնել կամ վերաուղղորդել։
Ռուսաստանի իշխանությունները և ռազմական ղեկավարները պարբերաբար հերքում են, որ թիրախավորում են Ուկրաինայում քաղաքացիական ենթակառուցվածքները։ Սակայն Ուկրաինայի իշխանությունները և այլ երկրների ու կազմակերպությունների ներկայացուցիչներ ընդգծում են, որ Ռուսաստանի գործողությունները միտումնավոր են։
Ուկրաինայի ռազմաօդային ուժերի հաղորդմամբ՝ գիշերը ռուսական ուժերն արձակել են չորս «Իսկանդեր-Մ» բալիստիկ հրթիռ և 114 անօդաչու թռչող սարք։ Հակաօդային պաշտպանության ուժերին հաջողվել է խոցել 101 ԱԹՍ։
Թարգմանությունը՝ Էմմա Չոբանյանի
