31.10.2026 | 13:33
Ամերիկյան ինդեքսները նվազել են
ՄԱԿ-ի ԱԽ-ն հավանություն է տվել Գազայի հարցով Թրամփի խաղաղության ծրագրին․ ՌԴ-ն ու Չինաստանը ձեռնպահ են մնացել
Քաղաքականություն
18.11.2025 | 11:33
ՄԱԿ-ի Անվտանգության խորհուրդը հաստատել է ԱՄՆ նախագահ Դոնալդ Թրամփի խաղաղության ծրագրի բանաձևը, որը նախատեսում է միջազգային ռազմական կոնտինգենտի տեղակայում Գազայի հատվածում։ Բանաձևը թույլատրում է անցնել ԱՄՆ նախագահի 20 կետանոց ծրագրի երկրորդ փուլին, որը ներառում է Գազայի ապառազմականացման և անցումային կառավարման մարմիններ ստեղծելու համար Միջազգային կայունացման ուժերի (ISF) ստեղծում, գրում է BBC-ի ռուսական ծառայությունը։
Անվտանգության խորհրդի անդամ 15 երկրներից 13-ը քվեարկել են բանաձևի օգտին, Ռուսաստանը և Չինաստանը ձեռնպահ են մնացել, բայց չեն օգտագործել իրենց վետոյի իրավունքը։
Բանաձևում նշվում է նաև Պաղեստին պետության ստեղծման հեռանկարի մասին, որին դեմ է Իսրայելը։ Այս դրույթը ներառվել է արաբական երկրների պնդմամբ։ Միջազգային կայունացման ուժերի կազմում կլինեն բազմաթիվ երկրների զորակազմեր, նշել են ԱՄՆ պաշտոնյաները՝ առանց հստակեցնելու, թե որ երկրների մասին է խոսքը։
ՀԱՄԱՍ-ը մերժել է բանաձևը դրա ընդունումից կարճ ժամանակ անց՝ պնդելով, որ այն չի հարգում պաղեստինցի ժողովրդի իրավունքներն ու պահանջները։ Թրամփի ծրագիրը «Գազայի հատվածում պարտադրում է միջազգային հոգաբարձության մեխանիզմ, որը մեր ժողովուրդը մերժում է», ասվում է խմբավորման հայտարարության մեջ։
«Գազայի հատվածում միջազգային ուժերին առաջադրանքներ և դերեր տալը, այդ թվում՝ դիմադրության զինաթափումը, զրկում է այս ուժին իր չեզոքությունից և վերածում այն հակամարտության կողմի, որն աջակցում է օկուպացիային»,- հայտարարել է ՀԱՄԱՍ-ը։
Բանաձևի վերջին տարբերակի համաձայն՝ Միջազգային կայունացման ուժերի գործառույթներից մեկը կլինի «ոչ պետական զինված խմբավորումների մշտական զինաթափումը», որոնց թվում է նաև ՀԱՄԱՍ-ը, ինչպես նաև քաղաքացիական բնակչության և մարդասիրական օգնության ուղիների պաշտպանությունը։ Միջազգային կայունացման ուժերից բացի, որոնք պարտավոր կլինեն համագործակցել Իսրայելի և Եգիպտոսի՝ Գազայի հատվածին սահմանակից երկու երկրների հետ, բանաձևը նախատեսում է նաև Գազայում նոր պաղեստինյան ոստիկանական ուժերի ստեղծում։ Խմբավորման համար, որը շատ երկրներում ահաբեկչական կազմակերպություն է համարվում, սա համարժեք է զենքը հանձնելու պահանջի։ Այն սկզբնապես ներառված էր Թրամփի ծրագրում։
ԱՄՆ նախագահի ծրագրի առաջին փուլը սկսվել է հոկտեմբերի 10-ին, երբ ուժի մեջ է մտել Իսրայելի և ՀԱՄԱՍ-ի միջև հրադադարի համաձայնագիրը և տեղի է ունեցել ողջ մնացած իսրայելցի պատանդների փոխանակումը պաղեստինցի գերիների հետ։
Միջազգային ռազմական ուժերից բացի՝ Գազայում պետք է ստեղծվի միջազգային Խաղաղության խորհուրդ, որը, ինչպես սպասվում է, կգլխավորի անձամբ Դոնալդ Թրամփը։
Ռուսաստանն ու Չինաստանը քննադատել են բանաձևը՝ պնդելով, որ քիչ է պարզությունը հիմնական մեխանիզմների կառուցվածքի վերաբերյալ, որ այն չի ապահովում մասնակցությունը ՄԱԿ-ի գործընթացին և ակնհայտորեն հավատարիմ չի մնում երկու պետությունների լուծմանը։
Իսրայելի և ՀԱՄԱՍ-ի միջև պատերազմը սկսվել է 2023 թվականի հոկտեմբերի 7-ին՝ իսրայելական հարավային շրջանների վրա հարձակումով։ Մոտավորապես 1200 մարդ զոհվել է, ևս 251-ը՝ պատանդ վերցվել։ ՀԱՄԱՍ-ի կողմից վերահսկվող Գազայի Առողջապահության նախարարության տվյալներով՝ Գազայում Իսրայելի գործողությունների հետևանքով զոհվել է 69,483 պաղեստինցի։
Թարգմանությունը՝ Էմմա Չոբանյանի
