04.08.2026 | 09:18
Նիկոլ Փաշինյանն աշխարհի առաջատար համալսարանների շրջանավարտներից մի քանիսին բարձր պաշտոններում է նշանակել
Ռուսական կողմն Ուկրաինայում հարվածել է 4000 տոննա հեղուկ գազով բեռնված թուրքական նավին. ՏԵՍԱՆՅՈՒԹ
Քաղաքականություն
17.11.2025 | 20:21
Ռուսական ուժերը երկուշաբթի թիրախավորել են թուրքական սեփականություն հանդիսացող ORINDA նավը, երբ այն խարսխված էր Օդեսայի մարզի Իզմայիլ նավահանգստում, ինչի հետևանքով նավում հրդեհ է բռնկվել, մոտակա շրջանների բնակիչներին տարհանել են պայթյունի վտանգի պատճառով, գրում է Turkiye today-ը։
Ռուս-ուկրաինական պատերազմի սկսվելուց ի վեր Սև ծովում թուրքական դրոշի ներքո կամ թուրքական սեփականության մի քանի առևտրային նավեր վնասվել են հակամարտության հետ կապված հարվածներից։
Մոտավորապես 4000 տոննա հեղուկ գազ (LPG) տեղափոխող նավը հարվածի տակ է հայտնվել Ռուսաստանի կողմից ուկրաինական ենթակառուցվածքների և ծովային թիրախների վրա շարունակական հարձակման ժամանակ։ Իզմայիլից Դանուբ գետի մյուս կողմում գտնվող ռումինական Պլաուրու գյուղի բնակիչները տարհանվել են նավի վրա բռնկված հրդեհից հետո։
Թուրքիայի ծովային գործերի գլխավոր վարչությունը հաստատել է, որ անձնակազմի բոլոր 16 թուրք անդամներն անվտանգ տարհանվել են նավից։ Նշվում է, որ նրանք տեղափոխվել են անվտանգ վայր։
Ուկրաինացի հրշեջները ժամանել են դեպքի վայր՝ հրդեհը մարելու համար։ Իշխանությունները հայտարարել են, որ հրդեհի մարումից հետո կկատարվի վնասի մանրամասն գնահատում։ Թուրքական իշխանություններն էլ հավելել են, որ ուշադիր հետևում են իրավիճակին և կապի մեջ են Ուկրաինայի համապատասխան մարմինների հետ։
Երկուշաբթի տեղի ունեցած միջադեպի ժամանակ ռուսական հրթիռային հարված է հասցվել Օդեսայում գտնվող Ուկրաինայի խոշորագույն մասնավոր էներգետիկ ընկերության՝ DTEK-ի կողմից շահագործվող էներգետիկ օբյեկտին։ Հարձակման հետևանքով 36,500 տնային տնտեսություններ մնացել էին առանց էլեկտրաէներգիայի։
Պաշտոնյաները հայտնել էին, որ մոտ 4,000 տների էլեկտրաէներգիան վերականգնվել է պահեստային գծերի միջոցով, մինչդեռ մնացած 32,500-ի համար ենթակառուցվածքի վերանորոգումը զգալի ժամանակ կպահանջի։
Թարգմանությունը՝ Էմմա Չոբանյանի
