Քաղաքականություն
17.11.2025 | 23:00
Ադրբեջանական դպրոցներում հայերի նկատմամբ ատելության քարոզը շարունակվում է։ Մասնավորապես, ադրբեջանցի լրագրող Ջավիդ Ահմեդովը դպրոցներից մեկում անցկացված միջոցառման կադրեր է հրապարակել։
«Նայեք այս խելագարությանն ադրբեջանական դպրոցում։ Ահա թե ինչպես են լվանում պատանիների ուղեղները։ Դպրոցը դարձել է քարոզչության վայր, այլ ոչ թե կրթության։ Աշակերտները դերային խաղում են, թե ինչպես են բռնում մի հայի և ստիպում նրան ասել՝ «Ղարաբաղն Ադրբեջան է»։ Ինչպիսի ամոթ կրթության համար»,- գրել է նա X-ի իր միկրոբլոգում։
Մեկ այլ գրառմամբ լրագրողը նշել է, որ Ադրբեջանի կառավարությունը տասնամյակներ շարունակ հանդես է եկել որպես զոհ՝ մեղադրելով Հայաստանին, միաժամանակ, այդպիսով, արդարացնելով երկրում բռնաճնշումներն ու անարդարությունը: Ըստ Ահմեդովի՝ անթիվ ընտանիքներ են տուժել ոստիկանության բռնության և կոռուպցիայի պատճառով, և նրանք պնդում են՝ «Մի՛ մեղադրեք ինձ գողության համար, մեղադրեք հայերին»:
Ահմեդովն ընդգծում է, որ եթե Ադրբեջանում հայատյացությունը նահանջի, կառավարությունը կկորցնի իր հիմնական քարոզչական գործիքը։ Այդ նարատիվը հանրային զայրույթը վերաուղղում է դեպի դուրս՝ թույլ տալով կոռուպցիային և ավտորիտարիզմին աննկատ գործել:
«Կառավարության ատելությունը չի սկսվել Հաղթանակի այգուց։ Դա պարզ էր ավելի վաղ, երբ Ռամիլ Սաֆարովը կացնով սպանեց հայ սպային և նրան հերոսի պես ընդունեցին։ Այգին նույն տրամաբանությամբ է՝ մահացածների սաղավարտներով և երեխաների համար ռասիստական մանեկեններով։ Սա անմարդկայնացում է»,- նշել է Ահմեդովը:
Թարգմանությունը՝ Էմմա Չոբանյանի
