01.04.2026 | 16:15
Մեծ Բրիտանիան Հորմուզի նեղուցի բացման հետ կապված հանդիպում կհյուրընկալի
Վրաստանում 2026 թվականի մարտից Հակակոռուպցիոն բյուրոն կլուծարվի
Քաղաքականություն
17.11.2025 | 23:11
Վրաստանի խորհրդարանի խոսնակ Շալվա Պապուաշվիլին հայտարարել է, որ Հակակոռուցիոն բյուրոն 2026 թվականի մարտի 2-ից կլուծարվի։ Ըստ նրա՝ կոռուպցիայի դեմ պայքարի բյուրոյի գործառույթներն ամբողջությամբ կփոխանցվեն Պետական աուդիտի ծառայությանը։
«Երկրորդ բլոկը վերաբերում է տարիներ շարունակ արտաքինից պարտադրված ձևաչափերով գոյություն ունեցող ինստիտուցիոնալ մոդելների վերանայմանը և համախմբմանը: Մեր նպատակն է ամրապնդել կառավարման համակարգի սահմանադրական կառուցվածքը և օպտիմալացնել հանրային ռեսուրսները»,- ասել է նա։
Պապուաշվիլիի խոսքով՝ կոռուպցիայի դեմ պայքարը կառավարության գերակա խնդիրներից մեկն է: Վերջերս այդ ուղղությամբ մի շարք նշանակալի քայլեր են ձեռնարկվել: Այս գործընթացում ներգրավված են Կառավարության աշխատակազմի արդյունավետության վարչությունը, Պետական աուդիտի ծառայությունը, Պետական անվտանգության ծառայության կոռուպցիայի դեմ պայքարի գործակալությունը և դատախազությունը:
«Այս համատեքստում Հակակոռուպցիոն բյուրոն, ըստ էության, կատարում է պաշտոնյաների, քաղաքական կուսակցությունների և ոչ կառավարական կազմակերպությունների հայտարարագրերի հավաքագրման և մոնիթորինգի գործառույթը։ Կառավարության հետ խորհրդակցություններից հետո ընդհանուր դիրքորոշում է ձեռք բերվել, որ այս գործառույթն ավելի համապատասխանում է պետական կառավարման սահմանադրական կառուցվածքին և պետք է փոխանցվի Պետական աուդիտի ծառայությանը, որպես ավելի բարձր և ավելի անկախ սահմանադրական մարմին։ Նախաձեռնության համաձայն՝ 2026 թվականի մարտի 2-ից Հակակոռուցիոն բյուրոն կլուծարվի, և դրա գործառույթներն ամբողջությամբ կփոխանցվեն Պետական աուդիտի ծառայությանը»,- հայտարարել է Շալվա Պապուաշվիլին։
Թարգմանությունը՝ Էմմա Չոբանյանի
