19.05.2026 | 19:33
Արթուրի հեռախոսը անհասկանալի հանգամանքներում անհետացել է, էջերն էլ՝ ջնջվել. փաստաբանը՝ Օսիպյանի մասին
Վրաստանի իշխանություններն առաջարկում են երկրի քաղաքացիներին արգելել արտերկրում քվեարկել
Քաղաքականություն
17.11.2025 | 14:18
Վրաստանի խորհրդարանը սկսել է նոր Ընտրական օրենսգրքի մշակումը, որը կսահմանի, որ քաղաքացիները կարող են Վրաստանում անցկացվող ընտրություններում քվեարկել միայն իրենց բնակության վայրում։ Այս մասին հայտարարել է երկրի խորհրդարանի խոսնակ Շալվա Պապուաշվիլին։
Նա նշել է, որ Վրաստանի խորհրդարանը կառաջարկի նոր «Ընտրական օրենսգիրք», որը կներդնի տեխնիկական բարելավումներ, կհստակեցնի ընթացակարգերը և կվերացնի կրկնվող դրույթները։
«Օրենսգրքի կարևոր փոփոխություններից մեկը վերաբերում է ոչ ռեզիդենտների, այսինքն՝ արտասահմանում բնակվող Վրաստանի քաղաքացիների քվեարկության ընթացակարգին: Նախևառաջ, պետք է ընդգծել, որ արտասահմանում բնակվող Վրաստանի քաղաքացիների ընտրական իրավունքները մնում են անփոփոխ: Ինչպես նախկինում՝ Վրաստանի յուրաքանչյուր քաղաքացի, անկախ իր բնակության վայրից կամ գտնվելու վայրից, ունի լիարժեք պասիվ և ակտիվ քվեարկության իրավունք։ Միևնույն ժամանակ, փոփոխությունը վերաբերում է քվեարկության ընթացակարգին և սահմանում է, որ ինչպես մունիցիպալ ընտրություններում, Վրաստանի խորհրդարանական ընտրություններում քվեարկությունը տեղի կունենա միայն Վրաստանի տարածքում: Այս որոշումը հիմնված է Վրաստանի Սահմանադրության 24-րդ հոդվածով սահմանված պետության պարտավորության վրա՝ ապահովելու կամքի ազատ դրսևորումը, որը ներառում է արտաքին միջամտությունից պաշտպանություն»,- ասել է Պապուաշվիլին։
Նա նշել է, որ ամբողջ աշխարհում ընտրությունները դառնում են ավելի խոցելի արտաքին ազդեցության նկատմամբ, ընտրություններին արտաքին միջամտության մեղադրանքները գնալով ավելի տարածված են դառնում, թե՛ ԱՄՆ-ում, թե՛ ԵՄ անդամ երկրներում։
Ըստ Պապուաշվիլիի՝ 2024 թվականի խորհրդարանական ընտրությունները նաև ցույց տվեցին, թե որքան բաց և բացահայտ կարող է լինել արտաքին տեղեկատվական և քաղաքական ճնշումը ընտրողների վրա։ Այս առումով ռիսկերը հատկապես բարձր են ոչ ռեզիդենտ Վրաստանի քաղաքացիների համար, որոնք գտնվում են մեկ այլ երկրում՝ օտարերկրյա իրավասության և քաղաքական միջավայրի ազդեցության տակ, որտեղ պետությունը չի կարողանում կանխել միջամտությունը։ Բացի այդ, ոչ ռեզիդենտները տեղեկատվական մանիպուլյացիայի բարձր ռիսկի տակ են։
«Այս մոդելը լիովին համապատասխանում է միջազգային չափանիշներին և գործում է այնպիսի երկրներում, ինչպիսիք են Իռլանդիան, Մալթան, Իսրայելը և Հայաստանը: Ես ևս մեկ անգամ ընդգծում եմ՝ արտասահմանում գտնվող քաղաքացիների ընտրական իրավունքում ոչինչ չի փոխվում: Ինչպես նախկինում՝ Վրաստանի յուրաքանչյուր քաղաքացի կունենա քվեարկելու լիարժեք իրավունք: Միակ պահանջը հայրենիք վերադառնալն ու Վրաստանում քվեարկելն է չորս տարին մեկ անգամ»,- ասել է Շալվա Պապուաշվիլին:
Թարգմանությունը՝ Էմմա Չոբանյանի
