Սաակաշվիլին Զելենսկիին խնդրել է իրեն քաղաքացիական ռազմագերի ճանաչել և փոխանակման շրջանակում վերադարձնել Ուկրաինա

Վրաստանի երրորդ նախագահ, Ուկրաինայի Օդեսայի մարզային վարչակազմի նախկին ղեկավար Միխեիլ Սաակաշվիլին, որը ներկայում գտնվում է վրացական բանտում, դիմել է Ուկրաինայի նախագահ Վլադիմիր Զելենսկիին՝ իրեն ռազմագերիների ցուցակում ընդգրկելու համար։

Նոյեմբերի 13-ին իր Ֆեյսբուքյան էջում ուկրաիներենով հրապարակված դիմումում Սաակաշվիլին նշել է. «Բացարձակ ակնհայտ է, իմ հետապնդումն ու ճակատագիրը կապված են պատերազմի հետ»։

Քաղաքական գործիչը շեշտել է, որ ինքն Ուկրաինայի քաղաքացի է, եղել է Ուկրաինայի Ազգային բարեփոխումների խորհրդի գործադիր կոմիտեի նախագահ, որտեղ աշխատել է Զելենսկիի ղեկավարության ներքո։

«Պուտինը սկզբից պահանջել է իմ նկատմամբ վրեժխնդրություն, իսկ Մեդվեդևն ու Լավրովը բազմիցս պարծեցել են իմ բանտարկությամբ»,- հայտարարել է Սաակաշվիլին։

«Ես կցանկանայի խնդրել ձեզ, ինչպես 2019 թվականին, երբ վերադարձրեցիք իմ անօրինականորեն չեղյալ հայտարարված Ուկրաինայի քաղաքացիությունը, խնդրում եմ ինձ՝ որպես Օդեսայի մարզային պետական ​​վարչակազմի նախկին ղեկավարի և Ազգային բարեփոխումների խորհրդի գործադիր կոմիտեի ղեկավարի, որն անօրինականորեն պահվում է Վրաստանի ռուսամետ ռեժիմի կողմից, ներառել այս պատերազմի քաղաքացիական գերիների ցուցակում՝ համապատասխան իրավական հետևանքներով։ Ես գիտեմ, որ ուկրաինացիները չեն լքում իրենցներին, և ես հույսս դնում եմ ձեզ վրա»,- նշել է Սաակաշվիլին։

Նա Զելենսկիին դիմել է հիվանդանոցից բանտ վերադառնալուց հաջորդ օրը։

Միխեիլ Սաակաշվիլին կալանքի տակ է 2021 թվականի հոկտեմբերից՝ նա կալանավորվել է Վրաստան վերադառնալուց կարճ ժամանակ անց։ Նրա առողջական վիճակը զգալիորեն վատթարացել է կալանքի տակ։ 2022 թվականի մայիսից նա բուժում էր ստանում Թբիլիսիի «Վիվամեդի» կլինիկայում։ Սաակաշվիլիի նկատմամբ կայացված համակցված դատավճռի համաձայն՝ նա պետք է մնա բանտում մինչև 2034 թվականի ապրիլի 1-ը։

Ուկրաինայի իշխանությունները բազմիցս կոչ են արել Վրաստանին Սաակաշվիլիին փոխանցել Կիևին՝ բուժման համար։ Վլադիմիր Զելենսկին հայտարարել է, որ «Ռուսաստանը, վրացական իշխանությունների միջոցով, սպանում է Ուկրաինայի քաղաքացի Միխեիլ Սաակաշվիլիին»։ Սակայն Վրաստանի իշխող «Վրացական երազանքը» մերժել է այս կոչերը։

Թարգմանությունը՝ Էմմա Չոբանյանի