Գրենոբլում քննարկվել են կիսահաղորդչային ոլորտում համագործակցության հնարավորությունները

Գրենոբլ կատարած աշխատանքային այցի ընթացքում ՀՀ բարձր տեխնոլոգիական արդյունաբերության նախարար Մխիթար Հայրապետյանի գլխավորած պատվիրակությունը հանդիպել է կիսահաղորդչային ոլորտի համաշխարհային առաջատար Soitec ընկերության ղեկավարությանը։ Քննարկվել են Հայաստանի և Ֆրանսիայի միջև կիսահաղորդչային տեխնոլոգիաների, ներդրումների և նորարարությունների ոլորտում համագործակցության ընդլայնման հնարավորությունները։ Այս մասին տեղեկացնում են ԲՏԱ նախարարությունից։

«Հանդիպման ընթացքում կողմերը քննարկել են կիսահաղորդչային ոլորտում համագործակցության հնարավորությունները, ներդրումների աջակցությունը և տեխնոլոգիական նորարարությունների զարգացումը։

Նախարար Հայրապետյանի գլխավորությամբ հայկական պատվիրակությունը ներկայացրել է Հայաստանի տեխնոլոգիական էկոհամակարգը, պետական առաջնահերթությունները և ոլորտի զարգացման ուղիները՝ ընդգծելով համատեղ նախաձեռնությունների, փորձի փոխանակման և տեղական մասնագետների ներգրավման կարևորությունը։

Հանդիպման ավարտին կողմերը կարևորել են համատեղ նախաձեռնությունների և գործընկերության շարունակական զարգացումը, ինչպես նաև քննարկել են առաջիկա նախագծերի և համագործակցության հնարավոր ուղիները։ Ձեռք են բերվել պայմանավորվածություններ՝ կիսահաղորդչային ոլորտում երկկողմանի համագործակցությունը խորացնելու և Հայաստանում նորարարական տեխնոլոգիաների ու ներդրումների իրականացմանն աջակցելու ուղղությամբ։

Soitec ընկերությունը մասնագիտացած է կիսահաղորդչային նյութերի (substrate) արտադրության մեջ և համարվում է համաշխարհային շուկայի առաջատարներից մեկը։ Ընկերությունը ստեղծում է բարձր արդյունավետությամբ և էներգախնայող կիսահաղորդչային նյութեր, որոնք լայնորեն կիրառվում են 5G, ավտոմոբիլային, «Իրերի համացանց» (IoT) և այլ առաջատար տեխնոլոգիական ոլորտներում»,- ասված է հաղորդագրությունում։